कंत्राटदाराला ५ लाख रुपये, तर सल्लागार संस्थेला २ लाख रुपयांचा दंड !

मुंबई – शहरातील चेंबूर येथील डायमंड गार्डन परिसरात शाळेच्या बसगाडीवर पिंपळाचे झाड पडले. या प्रकरणी नियुक्त केलेल्या चौकशी समितीने महानगरपालिका आयुक्त अश्विनी भिडे यांच्याकडे अहवाल सादर केला. त्यात झाडांच्या सुरक्षेसाठी नेमलेल्या कंत्राटदाराला ५ लाख रुपये, तर देखरेख करणार्‍या सल्लागार संस्थेला २ लाख रुपयांचा दंड करण्याची शिफारस करण्यात आली आहे, तसेच झाडांच्या सुरक्षिततेसाठी मानक कार्यपद्धत सिद्ध करून ती तातडीने लागू करण्याचे निर्देशही आयुक्तांनी दिले आहेत; मात्र या दुर्घटनेमध्ये रस्ते विभाग आणि उद्यान विभाग यांच्या अधिकार्‍यांना ‘क्लीनचीट’ (मोकळीक) दिली आहे.

१. संबंधित कंत्राटदाराने उत्खननाच्या वेळी आवश्यक दक्षता घेतली नसल्याचे निरीक्षण समितीने नोंदवले. कामावर देखरेख करणार्‍या सल्लागार संस्थेनेही योग्य पर्यवेक्षण केले नसल्याचे नमूद करत दोघांवर आर्थिक दंडाची शिफारस करण्यात आली आहे.

२. अहवालानुसार दुर्घटनेपूर्वी उद्यान विभागाने संबंधित परिसराची वेळोवेळी पहाणी केली होती, तसेच मोसमी पावसाच्या आधी झाडांची छाटणीही केली होती. पर्जन्यजल वाहिनीच्या कामाच्या वेळी झाडांच्या सुरक्षिततेविषयी उद्यान विभागाने रस्ते विभागाला वारंवार सूचना दिल्याने या दुर्घटनेत उद्यान विभाग किंवा रस्ते विभाग यांचा प्रथमदर्शनी कोणताही दोष आढळत नसल्याचे समितीने स्पष्ट केले आहे.