१४.४.२०२० या दिवशी नगर येथील साधक धनराज विभांडिक यांचे निधन झाले. मृत्यूसमयी त्यांचे वय ६० वर्षे होते. त्यांच्या आजारपणात आणि त्यांच्या मृत्यूनंतर त्यांच्या नातेवाइकांना जाणवलेली सूत्रे अन् आलेल्या अनुभूती येथे दिल्या आहेत.

मालनताई भावपूर्णरित्या नामस्मरण आणि प्रार्थना करतात. त्या घरातील सर्व कामे सेवा म्हणून करतात. ‘प्रतिदिन सत्संग ऐकायला मिळावा’, अशी त्यांची तळमळ असते. सत्संगात सांगितलेल्या सर्व गोष्टी त्या लगेच कृतीत आणतात.

बाबा घर, कार्यालय किंवा गुरुसेवा यांतील प्रत्येक कृती सेवा म्हणून करायचे. ते प्रत्येक कृती करण्यापूर्वी प्रार्थना आणि कृती झाल्यानंतर कृतज्ञता व्यक्त करायचे. ते आम्हालाही तसे करायला सांगायचे. त्यामुळे त्यांना समाधान आणि आनंद वाटायचा.