China On PL-15E Missile : ऑपरेशन सिंदूरच्या वेळी भारताने उद्ध्वस्त केलेल्या चिनी क्षेपणास्त्रावर पत्रकारांनी विचारलेल्या प्रश्नाला चीनने दिली बगल !

बीजिंग (चीन) – आपरेशन सिंदूरच्या वेळी पाककडून भारतावर क्षेपणास्त्रे आणि ड्रोन डागण्यात आले होते. यांतील काही क्षेपणास्त्रे चिनी बनावटीची होती. ती भारताने हवेतच उद्ध्वस्त केली, तर काही पडूनही फुटलीच नाहीत. यांत ‘पीएल-१५ ई’ हे क्षेपणास्त्र होते. याविषयी चिनी संरक्षण मंत्रालयाचे प्रवक्ते सीनियर कर्नल झांग जियाओगांग यांना पत्रकारांनी प्रश्न विचारल्यावर त्यांनी भलतेच उत्तर देऊन वेळ मारून नेली.

झांग जियाओगांग म्हणाले की, तुम्ही ज्या क्षेपणास्त्राचा उल्लेख करत आहात, ते निर्यात केले जाणारे शस्त्र आहे. हे क्षेपणास्त्र देश-विदेशात अनेक संरक्षण प्रदर्शनात मांडण्यात आले आहे. भारत आणि पाकिस्तान असे शेजारी आहेत, ज्यांना वेगळे केले जाऊ शकत नाही. दोन्ही बाजू शांत आणि संयमित रहातील, अशी अपेक्षा आहे.