मुख्‍यमंत्री कार्यालयाच्‍या प्रधान सचिवपदी अश्‍विनी भिडे यांची नियुक्‍ती !

मुंबई – मुंबई मेट्रो रेल कॉर्पोरेशन लिमिटेडच्‍या व्‍यवस्‍थापकीय संचालिका अश्‍विनी भिडे यांचे स्‍थानांतर झाले आहे. त्‍यांची नियुक्‍ती मुख्‍यमंत्री कार्यालयाच्‍या प्रधान सचिवपदी करण्‍यात आली आहे. अश्‍विनी भिडे यांना त्‍वरित या पदाचा कारभार हाती घेण्‍याचे आदेश देण्‍यात आले असून पुढील आदेशापर्यंत मेट्रोच्‍या व्‍यवस्‍थापकीय पदाचा कार्यभार सांभाळण्‍याचेही निर्देश देण्‍यात आले आहेत. यापूर्वी मुख्‍यमंत्री कार्यालयाचा पदभार ब्रिजेश सिंह पहात होते.

अश्‍विनी भिडे या वर्ष १९९५ च्‍या बॅचच्‍या आय.ए.एस्. अधिकारी आहेत. त्‍यांना सनदी सेवेतील २५ वर्षांचा अनुभव आहे. मुंबईत मेट्रोचे जाळे निर्माण करण्‍यात त्‍यांनी महत्त्वाचे योगदान दिले आहे. त्‍यामुळे त्‍यांना ‘मुंबई मेट्रो वुमन’ म्‍हणून ओळखले जाते.