आरती परम पूज्य गुरुदेवांची ।

सच्चिदानंद परब्रह्म डॉ. आठवले यांच्याप्रति उत्कट भाव असणारे घाटकोपर, मुंबई येथील श्री. बबन गेणभाऊ वाळुंज (वय ६३ वर्षे) यांना त्यांच्याविषयी सुचलेली आरती येथे देत आहोत.’

जय देव जय देव । जय श्री जयंतदेवा (टीप) ।
ओवाळितो आरती । हरपली भवचिंता ।। धृ ।।

आठविता तुला विसरलो मीपणा ।
दयाळू, कृपाळू दयेच्या सागरा ।
साधकांचा कैवारी, षड्रिपू संहारी ।
दोष-अहं निर्दाळी, भक्ता ठेवी चरणांसी ।। १ ।।

गुरु, सद्गुरु, गुरुदेव तूची ।
मेरुमणी तू आहे सप्तलोकांचा ।
स्वामी तू भावाचा भुकेला रे ।
निर्गुणात असता सगुणात येसी रे ।। २ ।।

गुरूंचा गुरुदेव, देव परात्पर ।
श्रीमन्नारायण महाविष्णूचा अवतार ।
प्रल्हादा संकट पडता जड भारी ।
धावे तू सत्वर ब्रिदासाठी ।। ३ ।।

सहस्रार्जुन क्षत्रिय मातले ।
अवतार घेतलास परशुरामाचा ।
निर्दाळी दुष्ट बहुजन ।
साधकांसी दिले अभयदान ।। ४ ।।

ऋषी नारद नारायण नारायण ।
पापी वाल्या ते वाल्मीकि ।
तरले रामनामे ।
त्रेतायुगी तू दिले तयांसी थोरपण ।। ५ ।।

कंस, शिशुपाल, कौरव, बकासुर ।
नाम तुझे घेता कापती थरथर ।
पांडवांचा सखा, द्रौपदीचा दाता ।
कर्ता-अकर्ता अर्जुनाचा सारथी ।। ६ ।।

कलियुगांतर्गत कलियुगी श्री जयंत गुरुदेव ।
अंतर्बाह्य देह करितो तू निर्मळ ।
परम पूज्य गुरुदेव, तूच परमेश्वर ।
कलियुगी अवतार विष्णुनारायण ।। ७ ।।

श्रीधर, महादेव, तू जयंतदेव ।
गुरुदेव तुझे भक्तराज महाराज, दिधला आशीर्वाद ।
जगत् कल्याणासाठी ग्रंथ संकलक तूच गुरुदेव ।
कर्ता-करविता, नामा तू निराळा ।। ८  ।।

चैतन्याचा जिव्हाळा, साधकांचा आत्मा ।
संतांचा परमात्मा सखा पांडुरंग ।
मेळविली मांदियाळी संत महात्म्यांची ।
स्थापना तू करितो ईश्वरी राज्याची ॥ ९ ॥

जय जयंत माता, श्री जयंत पिता ।
बंधू-भगिनी तूची गुरुदेवा ।
सगुण त्रिगुण गुणातीत निर्गुण ।
साधकांचे ध्येय गुरुकृपायोग ।। १० ।।

जय देव जय देव जय श्री जयंतदेवा ।
जय देव जय देव जय श्री जयंतदेवा ।
ओवाळितो आरती हरपली भवचिंता ।
जय देव जय देव जय श्री जयंतदेवा ।। ११ ।।

टीप : परात्पर गुरु डॉ. आठवले

– श्री. बबन गेणभाऊ वाळुंज (वय ६३ वर्षे), घाटकोपर, मुंबई

येथे प्रसिद्ध करण्यात आलेल्या अनुभूती या ‘भाव तेथे देव’ या उक्तीनुसार साधकांच्या वैयक्तिक अनुभूती आहेत. त्या सरसकट सर्वांनाच येतील असे नाही. – संपादक