भयपट पाहिल्याने व्यक्तीच्या सूक्ष्म ऊर्जेवर (‘ऑरा’वर) नकारात्मक परिणाम होतात ! – महर्षि अध्यात्म विश्वविद्यालयाचे संशोधन

‘महर्षि अध्यात्म विश्वविद्यालया’ने ‘यू.ए.एस्. (युनिव्हर्सल ऑरा स्कॅनर)’ या उपकरणाद्वारे केलेली वैज्ञानिक चाचणी

‘सध्याच्या धकाधकीच्या जीवनात व्यक्ती मनोरंजनाच्या शोधात असते. अशा वेळेस चित्रपट पहाणे, हे मनोरंजनाचे मुख्य साधन बनले आहे. काही लोक केवळ मनोरंजन म्हणून चित्रपट पहातात, तर काही लोक आवड म्हणून चित्रपट पहातात. चित्रपटाचे अनेक प्रकार आहेत, उदा. विनोदी चित्रपट, मूकपट, भयपट, भक्तीपट, काल्पनिक चित्रपट इत्यादी. व्यक्ती ज्या प्रकारचा चित्रपट पहाते, त्या प्रकारच्या स्पंदनांचा परिणाम तिच्यावर होत असतो. व्यक्तीने भयपट (भीतीदायक दृश्ये असणारा चित्रपट) पाहिल्यावर तिच्या सूक्ष्म-ऊर्जेवर (‘ऑरा’वर) काय परिणाम होतो ?’, हे वैज्ञानिकदृष्ट्या अभ्यासण्यासाठी एक चाचणी करण्यात आली. या चाचणीसाठी ‘युनिव्हर्सल ऑरा स्कॅनर’ या उपकरणाचा उपयोग करण्यात आला. या उपकरणाने व्यक्ती, वस्तू आणि वास्तू यांच्यामधील सकारात्मक अन् नकारात्मक ऊर्जा मोजता येते.

१. चाचणीतील निरीक्षणे

या प्रयोगात ४ व्यक्तींनी भयपट पहाण्यापूर्वी आणि पाहिल्यानंतर त्यांच्या चाचण्या करण्यात आल्या. या चाचण्यांतील निरीक्षणे पुढे दिली आहेत.

टीप – सध्याचा काळ रज-तमप्रधान असल्याने व्यक्तीचे मन, बुद्धी आणि शरीर यांच्यावर रज-तमात्मक (त्रासदायक) स्पंदनांचे आवरण येते. त्यामुळे चाचणीतील आध्यात्मिक त्रास नसलेल्या व्यक्तींमध्येही काही प्रमाणात त्रासदायक स्पंदने आढळून आली. या त्रासदायक स्पंदनांपासून रक्षण होण्यासाठी प्रत्येकाने प्रतिदिन स्वतःवरील आवरण अधून-मधून काढणे आवश्यक आहे. आवरण काढण्यासाठी विविध पद्धतींचा उपयोग करू शकतो, उदा. विभूती लावणे, गोमूत्र शिंपडणे, स्तोत्र म्हणणे किंवा ऐकणे, नामजप करणे इत्यादी.

२. चाचणीतील निरीक्षणांचे विवेचन आणि निष्कर्ष

अ. भयपट पाहिल्यानंतर चारही व्यक्तींमधील नकारात्मक ऊर्जेची प्रभावळ पुष्कळ वाढली आणि सकारात्मक ऊर्जेची प्रभावळ पुष्कळ उणावली. यातून ‘भयपट पाहिल्याने व्यक्तीच्या सूक्ष्म ऊर्जेवर नकारात्मक परिणाम होतात’, हे स्पष्ट झाले.

आ. हा नकारात्मक परिणाम आध्यात्मिक त्रास नसणार्‍या व्यक्तींच्या तुलनेत तीव्र आध्यात्मिक त्रास असणार्‍या व्यक्तींवर अधिक प्रमाणात झाला.

इ. दुसर्‍या दिवशीही सर्वांवर हा नकारात्मक परिणाम टिकून होता; पण त्याचे प्रमाण निरनिराळे होते.

निष्कर्ष : व्यक्तीने भयपट पहाणे कोणत्याही व्यक्तीसाठी आध्यात्मिकदृष्ट्या हानीकारक आहे.

३. चाचणीतील निरीक्षणांचे अध्यात्मशास्त्रीय विश्लेषण

३ अ. भयपट पाहिल्याचा चाचणीतील सर्वांवर (त्यांच्या सूक्ष्म-ऊर्जेवर) नकारात्मक परिणाम होण्याचे कारण : भयपटातून प्रक्षेपित झालेल्या त्रासदायक स्पंदनांमुळे चाचणीतील सर्वांवरील त्रासदायक स्पंदनांचे आवरण वाढले. त्यामुळे त्यांच्यातील नकारात्मक ऊर्जा पुष्कळ वाढली आणि सकारात्मक ऊर्जा पुष्कळ न्यून झाली. या सर्वांच्या सूक्ष्म-ऊर्जेवर झालेला नकारात्मक परिणाम दुसर्‍या दिवशीही टिकून होता; पण त्याचे प्रमाण निरनिराळे होते.

३ आ. आध्यात्मिक त्रास नसणार्‍या व्यक्तींच्या तुलनेत तीव्र आध्यात्मिक त्रास असणार्‍या व्यक्तींवर अधिक प्रमाणात नकारात्मक परिणाम होण्याची कारणे

१. तीव्र आध्यात्मिक त्रास असणार्‍या व्यक्तींमध्ये त्यांच्या त्रासामुळे मूलतः नकारात्मक ऊर्जा अधिक प्रमाणात आढळली. भयपटातून प्रक्षेपित झालेली त्रासदायक स्पंदने त्यांना त्रास देणार्‍या वाईट शक्तींनी अधिक प्रमाणात ग्रहण केल्याने त्यांच्यातील (तीव्र आध्यात्मिक त्रास असणार्‍या व्यक्तींतील) नकारात्मक ऊर्जेची प्रभावळ पुष्कळ वाढली आणि दुसर्‍या दिवशीही तिचे प्रमाण फारसे उणावले नाही. याउलट आध्यात्मिक त्रास नसणार्‍या व्यक्तींमध्ये आरंभी अल्प प्रमाणात नकारात्मक ऊर्जा आढळली. भयपटातून प्रक्षेपित झालेल्या त्रासदायक स्पंदनांचा त्यांच्यावर तात्कालिक परिणाम झाला; म्हणून त्यांच्यातील नकरात्मक ऊर्जा वाढली; पण दुसर्‍या दिवशी ती उणावली.

२. व्यक्तीमध्ये सकारात्मक ऊर्जा आढळण्यामागे तिचे मनोबल, आत्मबळ आणि तिच्यातील सात्त्विक स्पंदने हे पैलू असतात, तसेच व्यक्तीमधील न्यून झालेली सकारात्मक ऊर्जा पुन्हा वाढण्यामागील कारण तिची त्रासदायक स्पंदनांविरुद्ध असणारी प्रतिकारक्षमता आहे. आध्यात्मिक त्रास नसणार्‍या व्यक्तींमध्ये वरील सर्व पैलू मूलतः असल्यामुळे भयपट पाहिल्यानंतर त्यांच्यातील सकारात्मक ऊर्जेची प्रभावळ न्यून झाली; परंतु दुसर्‍या दिवशी (भयपट पाहिल्याच्या १ दिवसानंतर) ती पुन्हा वाढली. याउलट तीव्र आध्यात्मिक त्रास असणार्‍या व्यक्तींमध्ये त्यांना असलेल्या तीव्र त्रासामुळे मनोबल, आत्मबळ आणि त्रासदायक स्पंदनांविरुद्ध असणारी प्रतिकारक्षमता अल्प असते. त्यामुळे भयपट पाहिल्यानंतर त्यांच्यातील सकारात्मक ऊर्जेची प्रभावळ न्यून झाली आणि दुसर्‍या दिवशी ती आणखी उणावली.

थोडक्यात ‘व्यक्तीला आध्यात्मिक त्रास असो किंवा नसो; पण तिच्यावर त्रासदायक स्पंदनांचा नकारात्मक परिणाम हा होतोच, केवळ त्याचे प्रमाण अल्प-अधिक असते’, हे लक्षात घेऊन त्रासदायक स्पंदने निर्माण करणार्‍या भयपटासारख्या गोष्टींपासून दूर रहाणे व्यक्तीसाठी हितावह आहे.’ (७.४.२०२४)

– श्री. गिरीश पंडित पाटील, महर्षि अध्यात्म विश्वविद्यालय, गोवा.

इ-मेल : http://[email protected]

वाईट शक्ती : वातावरणात चांगल्या आणि वाईट शक्ती कार्यरत असतात. चांगल्या शक्ती चांगल्या कार्यासाठी मानवाला साहाय्य करतात, तर वाईट शक्ती त्याला त्रास देतात. पूर्वीच्या काळी ऋषिमुनींच्या यज्ञांत राक्षसांनी विघ्ने आणल्याच्या अनेक कथा वेद-पुराणांत आहेत. ‘अथर्ववेदात अनेक ठिकाणी वाईट शक्ती, उदा. असुर, राक्षस, पिशाच तसेच करणी, भानामती यांचा प्रतिबंध करण्यासाठी मंत्र दिले आहेत. वाईट शक्तींच्या त्रासांच्या निवारणार्थ विविध आध्यात्मिक उपाय वेदादी धर्मग्रंथांत सांगितले आहेत. आध्यात्मिक त्रास : याचा अर्थ व्यक्तीमध्ये नकारात्मक स्पंदने असणे. व्यक्तीमध्ये नकारात्मक स्पंदने ५० टक्के किंवा त्यांहून अधिक प्रमाणात असणे, म्हणजे तीव्र त्रास, नकारात्मक स्पंदने ३० ते ४९ टक्के असणे, म्हणजे मध्यम त्रास, तर ३० टक्क्यांहून अल्प असणे, म्हणजे मंद आध्यात्मिक त्रास असणे होय. आध्यात्मिक त्रास हा प्रारब्ध, पूर्वजांचे त्रास आदी आध्यात्मिक स्तरावरील कारणांमुळे होतो. आध्यात्मिक त्रासाचे निदान संत किंवा सूक्ष्म स्पंदने जाणू शकणारे साधक करू शकतात. सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे  ‘सूक्ष्म’. साधनेत प्रगती केलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत. सूक्ष्मातील दिसणे, ऐकू येणे इत्यादी (पंच सूक्ष्मज्ञानेंद्रियांनी ज्ञानप्राप्ती होणे) : काही साधकांची अंतर्दृष्टी जागृत होते, म्हणजे त्यांना डोळ्यांना न दिसणारे दिसते, तर काही जणांना सूक्ष्मातील नाद किंवा शब्द ऐकू येतात. वाचकांना सूचना : ‘यू.ए.एस्.’ उपकरणाची ओळख’ या लेखातील ‘यू.ए.एस्.’ उपकरणाची ओळख’, ‘उपकरणाद्वारे करावयाच्या चाचणीतील घटक आणि त्यांचे विवरण’, ‘घटकाची प्रभावळ मोजणे’, ‘परीक्षणाची पद्धत’ आणि ‘चाचणीमध्ये सारखेपणा येण्यासाठी घेतलेली दक्षता’ ही नेहमीची सूत्रे सनातन संस्थेच्या http://goo.gl/tBjGXa या लिंकवर दिली आहेत. या लिंकमधील काही अक्षरे कॅपिटल (Capital) आहेत. येथे प्रसिद्ध करण्यात आलेल्या अनुभूती या ‘भाव तेथे देव’ या उक्तीनुसार साधकांच्या वैयक्तिक अनुभूती आहेत. त्या सरसकट सर्वांनाच येतील असे नाही. – संपादक