गांधीनगर (जिल्हा कोल्हापूर) येथील मोकाट आणि पिसाळलेल्या कुत्र्यांचा बंदोबस्त करावा !

उद्धव बाळासाहेब ठाकरे शिवसेना गटाच्या वतीने निवेदन सादर

गांधीनगर (जिल्हा कोल्हापूर), १० मार्च (वार्ता.) – मोकाट आणि पिसाळलेल्या कुत्र्यांनी गांधीनगरमध्ये अनेक जणांना घायाळ केले आहे. मोकाट कुत्री, गाढवे यांच्याविषयी गांधीनगर ग्रामपंचायतला वारंवार तक्रार देऊनही कार्यवाही न झाल्याने मागील २ दिवसांत पिसाळलेल्या कुत्र्यांनी २५ जणांचा चावा घेतला आहे. त्यामुळे गांधीनगर ग्रामपंचायतवर त्वरित कारवाई करावी आणि मोकाट कुत्री, गाढवे यांचा बंदोबस्त करावा, तसेच गांधीनगर येथे कायमस्वरूपी ग्रामविकास अधिकार्‍यांची नियुक्ती करावी, या मागण्यांचे निवेदन उद्धव बाळासाहेब ठाकरे गटाच्या वतीने पंचायत समिती करवीरचे प्रशासक तथा गट विकास अधिकारी विजय वसंत यादव यांना देण्यात आले.

येत्या ८ दिवसात संबंधित ग्रामपंचायतीने मोकाट कुत्री आणि गाढवे यांच्यावर  कारवाई न केल्यास संबंधित ग्रामपंचायत आणि पंचायत समिती यांमध्ये मोकाट कुत्री अन् गाढवे सोडण्याचे आंदोलन करण्यात येईल, अशी चेतावणी शिवसेना उद्धव बाळासाहेब ठाकरे गटाच्या वतीने करवीर तालुकाप्रमुख राजू यादव यांनी गटविकास अधिकार्‍यांना दिली. या वेळी करवीर तालुकाप्रमुख राजू यादव, उपजिल्हा समन्वय विक्रम चौगुले यांच्यासह अन्य पदाधिकारी उपस्थित होते.