नेत्रदीपक रिंगण आणि बंधूभेटीनंतर संतश्रेष्ठ ज्ञानेश्वर महाराज अन् जगद्गुरु संत तुकाराम महाराज यांच्या पालख्यांचे पंढरपूरमध्ये आगमन !

पंढरपूर – आषाढ शुक्ल अष्टमीच्या दिवशी संतश्रेष्ठ ज्ञानेश्वर महाराज आणि जगद्गुरु संत तुकाराम महाराज यांच्या पालख्यांचा पंढरपूर तालुक्यात प्रवेश झाला. यापूर्वी संतश्रेष्ठ ज्ञानेश्वर महाराजांच्या पालखीचे ठाकूरबुवा समाधी येथे नेत्रदीपक गोल रिंगण पार पडले, तर माळशिरस तालुक्याच्या हद्दीत संत सोपानदेव महाराज (सोपानकाका) यांच्या पालखीशी भावपूर्ण बंधूभेट झाली.
वेळापूर येथून प्रस्थान केल्यानंतर संतश्रेष्ठ ज्ञानेश्वर महाराजांची पालखी ठाकूरबुवा समाधी येथे पोचली. येथे टाळ-मृदुंगाच्या गजरात आणि ‘माऊली… माऊली…’च्या जयघोषात गोल रिंगण पार पडले. त्यानंतर पालखी पुढे मार्गस्थ झाली. दुपारच्या भोजनानंतर टप्पा येथे संतश्रेष्ठ ज्ञानेश्वर महाराज आणि संत सोपानदेव महाराज यांच्या पालख्यांची बंधूभेट झाली.

दोन्ही पालख्यांचे रथ काही वेळ समोरासमोर थांबवण्यात आले. या वेळी दोन्ही संस्थानांच्या मानकर्‍यांनी परस्परांना मानाचा नारळ आणि प्रसाद अर्पण केला. या प्रसंगी वारकर्‍यांनी ‘विठ्ठल…विठ्ठल..’ असा जयघोष केला. त्यानंतर संतश्रेष्ठ ज्ञानेश्वर महाराजांची पालखी भंडीशेगाव येथे मुक्कामी पोचली. जगद्गुरु संत तुकाराम महाराज यांची पालखी बोरगावमार्गे तोंडले-बोंडले येथे पोचली. संतश्रेष्ठ ज्ञानेश्वर महाराज आणि जगद्गुरु संत तुकाराम महाराज यांच्या पालख्यांचे पंढरपूर तालुक्यात आगमन झाल्यानंतर प्रशासनाच्या वतीने दोन्ही पालख्यांचे स्वागत केले.