पंढरपूर मंदिरातील १ टन द्राक्षे गायब झाल्याच्या प्रकरणाची सखोल चौकशी करावी !

‘श्री विठ्ठल-रुक्मिणी मंदिर संरक्षण कृती समिती’ची पोलीस प्रशासनाकडे निवेदनाद्वारे मागणी

पंढरपूर (जिल्हा सोलापूर), ५ मार्च (वार्ता.) – आमलकी एकादशीच्या निमित्ताने ३ मार्च या दिवशी श्री विठ्ठल-रुक्मिणी मंदिरात १ टन द्राक्षांची सजावट केली होती. या सजावटीनंतर अवघ्या १ घंट्यामध्ये १ टन द्राक्षे गायब झाली. मंदिरातील ‘सीसीटीव्ही फुटेज’ची तपासणी करून संबंधित अधिकारी आणि कर्मचारी यांच्यावर कारवाई करावी, या मागणीचे निवेदन ‘श्री विठ्ठल-रुक्मिणी मंदिर संरक्षण कृती समिती’च्या वतीने येथील पोलीस ठाणे येथे देण्यात आले. याप्रसंगी मंदिर संरक्षण कृती समितीचे अध्यक्ष श्री. गणेश लंके, हिंदु महासभेचे शहर अध्यक्ष श्री. बाळासाहेब डिंगरे, विश्व हिंदु परिषदेचे सामाजिक समरस्ताचे प्रांतिक सदस्य श्री. रवींद्र साळे (सर), हिंदु जनजागृती समितीचे श्री. शशिशेखर पाटील, पेशवा युवा मंचचे सर्वश्री प्रणव नाझरकर, ओंकार कुलकर्णी, किशोर कुलकर्णी, ओंकार वाटणे आदी उपस्थित होते.

निवेदनात म्हटले आहे की, द्राक्षे गायब झाल्याच्या प्रकरणी मंदिर प्रशासनाकडे चौकशी केली असता व्यवस्थापक बालाजी पुदलवाड यांनी सांगितले की, भाविकांनी द्राक्षे तोडून नेली; तर काही द्राक्षे काढून ठेवली. काढलेली द्राक्षे कुणी नेली असतील, तर त्याची चौकशी करून संबंधितांवर कारवाई केली जाईल; मात्र या प्रकरणी कोणती कार्यवाही झाली आहे, हे अद्याप समजलेले नाही. मंदिरातील ही सजावट नेमकी किती काळ चालली ? या काळात गाभार्‍याचे दार बंद होते किंवा नाही ? शेजारती झाल्यावर सजावट चालू होती का ? याचीही चौकशी होणे आवश्यक आहे.