परात्पर गुरु डॉ. आठवले यांच्या ८० व्या जन्मोत्सवानिमित्त आयोजित केलेल्या रथोत्सवाचे श्री. राम होनप यांनी केलेले सूक्ष्मातील परीक्षण !

२२ मे २०२२ या दिवशी ८० व्या जन्मोत्सवानिमित्त परात्पर गुरु डॉ. आठवले यांचा रथोत्सव आयोजित करण्यात आला. त्या वेळी देवाने माझ्याकडून करवून घेतलेले सूक्ष्मातील परीक्षण पुढे दिले आहे.

१. रथोत्सव चालू होण्यापूर्वी

परात्पर गुरु डॉ. आठवले यांनी ‘श्रीराम शाळिग्रामा’चे पूजन केले, तेव्हा ‘शाळिग्रामाच्या जागी साक्षात् भगवान शिव असून तो परात्पर गुरु डॉक्टरांना आशीर्वाद देत आहे’, असे मला दृश्य दिसले.

२. रथोत्सव चालू झाल्यावर

अ. माझ्या मनाला सतत आनंद जाणवत होता.

आ. परात्पर गुरु डॉक्टरांच्या माध्यमातून वातावरणात दूरवर चैतन्याचे प्रक्षेपण होत होते. त्यामुळे वातावरणाची शुद्धी होत होती, तसेच रथोत्सवात भावपूर्ण सहभागी झालेल्या साधकांना परात्पर गुरु डॉक्टरांकडून आशीर्वादात्मक चैतन्यलहरी प्राप्त होत होत्या.

इ. ‘परात्पर गुरु डॉक्टरांच्या अस्तित्वाने रथोत्सवाभोवतीचा संपूर्ण परिसर चैतन्यमय बनल्याने रथयात्रेत वाईट शक्तींना कुठलाही अडथळा आणता आला नाही, तसेच वाईट शक्तींना चैतन्यामुळे रथोत्सवापासून दूर अंतरावर थांबावे लागले आणि त्याचा त्यांना राग आला आहे’, असे मला जाणवले.

३. रथोत्सवानंतर

रथोत्सव पूर्ण झाल्यावर महर्षींच्या आज्ञेने श्रीसत्‌शक्ति (सौ.) बिंदा नीलेश सिंगबाळ आणि श्रीचित्‌‌शक्ति (सौ.) अंजली मुकुल गाडगीळ यांनी परात्पर गुरु डॉक्टरांच्या चरणांवर फुले अर्पण केली. त्यानंतर सद्गुरु डॉ. मुकुल गाडगीळ यांनी परात्पर गुरु डॉक्टरांची कोहळ्यावर जळता कापूर ठेवून दृष्ट काढली. त्या वेळी सूक्ष्मातून जाणवलेली सूत्रे पुढे दिली आहेत.

३ अ. चरणांवर फुले अर्पण करणे : या वेळी मला परात्पर गुरु डॉक्टरांच्या चरणांजवळ सूक्ष्मातून ‘काही देवता हात जोडून उभ्या आहेत’, असे दृश्य मला दिसले. या प्रसंगातून यापूर्वी ‘गुरूंच्या चरणांजवळच सर्वकाही असते’, हे कीर्तन किंवा प्रवचन यांतून ऐकले होते. ते प्रत्यक्ष अनुभवता आले

३ आ. दृष्ट काढणे : या वेळी परात्पर गुरु डॉक्टरांपासून काही अंतरावर त्यांना त्रास देण्यासाठी आलेल्या मोठ्या वाईट शक्ती मला दिसल्या. त्यांपैकी काही वाईट शक्तींची काळी शक्ती कोहळ्यात खेचली गेली. त्यामुळे ‘त्या वाईट शक्तींचा जोर काही प्रमाणात न्यून झाला आहे’, असे मला जाणवले.

– श्री. राम होनप (सूक्ष्मातून प्राप्त झालेले ज्ञान), सनातन आश्रम, रामनाथी, गोवा. (२५.५.२०२२)