नवरात्रोत्सवात प्रतिघंट्याला १ सहस्र भाविकांना दर्शन मिळावे असे नियोजन ! – शिवराज नाईकवाडे, सचिव, पश्चिम महाराष्ट्र देवस्थान व्यवस्थापन समिती

जोतिबा देवस्थान येथे व्यवस्थापन समितीच्या नियोजनाच्या बोजवार्‍यामुळे भाविकांचे दर्शनासाठी हाल !

जोतिबा – श्री महालक्ष्मीदेवी मंदिराप्रमाणेच जोतिबा देवस्थान येथेही ‘ई-पास’द्वारे भाविकांना दर्शनाची व्यवस्था करण्यात आली आहे; मात्र व्यवस्थापन समितीच्या नियोजनाच्या बोजवार्‍यामुळे भाविकांचे दर्शनासाठी हाल होत आहेत. पाससाठी ‘नेटवर्क’ न मिळणे ही सर्वांत मुख्य समस्या असून भाविकांना योग्य माहिती न मिळणे, यामुळे भाविकांना भर उन्हात थांबावे लागत आहे. विशेषकरून वयोवृद्ध भाविकांना याचा त्रास मोठ्या प्रमाणात सहन करावा लागत आहे. कर्नाटकातून येणार्‍या भाविकांना भाषेची अडचण येत असून ‘ई-पास’ न मिळाल्याने अनेकांना केवळ शिखराचे दर्शन घेऊन परतावे लागत आहे. (अनेक मासांनंतर मंदिरे उघडल्याने शेकडो किलोमीटर अंतरावरून येणार्‍या भाविकांना दर्शन मिळावे यांसाठी तांत्रिक त्रुटी दूर करून भाविकांना सुलभरितीने दर्शन कसे मिळेल ? यासाठी देवस्थान व्यवस्थापन समितीने प्रयत्न करणे अपेक्षित आहे ! – संपादक)