सांगली जिल्ह्यातील कोरोना रुग्णालयांची अचानक पहाणी करा ! – मयुर घोडके, शहरप्रमुख, शिवसेना

सांगली – शहरासह जिल्ह्यातील काही कोरोना रुग्णालयांची प्रशासनाने अचानक पहाणी करावी. रुग्ण आणि त्यांचे नातेवाईक यांच्या समस्या जाणून घ्याव्यात, त्या ठिकाणी ‘सी.सी.टी.व्ही.’ बसवावेत, अशा मागण्यांचे निवेदन शिवसेनेचे शहरप्रमुख श्री. मयुर घोडके आणि सरचिटणीस श्री. राहुल यमगर यांनी जिल्हाधिकार्‍यांना दिले आहे.

या निवेदनात म्हटले आहे की, प्रशासन प्रभावीपणे काम करत आहे; परंतु कोरोना रुग्ण आणि त्यांचे नातेवाईक यांना अनेक समस्यांचा सामना करावा लागत आहे. रुग्णालयात प्रशासकीय प्रतिनिधी नेमले असले, तरी अनेक वेळा रुग्णाच्या मनात शंका निर्माण होत आहेत. तरी जिल्हाधिकार्‍यांनी रुग्णालयांना भेट देऊन येणार्‍या शंकांचे निरसन करावे. यामुळे रुग्णालयात काही अपप्रकार होत असेल, तर त्याला आळा बसेल.