Sant Balumama Devasthan Scam : तत्कालीन धर्मादाय निरीक्षक रागिणी खडके यांच्यासह कंत्राटदाराविरुद्ध गुन्हा नोंद !

कोल्हापूर – राज्यातील लाखो भाविकांचे श्रद्धास्थान असलेल्या आदमापूर येथील ‘संत बाळूमामा देवस्थाना’मध्ये ५५ लाख रुपयांचा घोटाळा झाल्याचा आरोप करण्यात आला आहे. या प्रकरणी प्रशासनाने तत्कालीन धर्मादाय निरीक्षक अधिकारी रागिणी खडके आणि संबंधित कंत्राटदार यांच्याविरुद्ध गुन्हा नोंदवला आहे.

या प्रकरणी अगोदरच रागिणी खडके यांच्याविरुद्ध निलंबनाची कारवाई करण्यात आली आहे. (मंदिर सरकारीकरणाचे दुष्परिणाम ! जेव्हा कोणत्याही देवस्थानावर प्रशासक नेमण्यात आले, तेव्हा प्रत्येक प्रशासकीय कार्यालयात कोणत्या ना कोणत्या रूपात भ्रष्टाचार झाल्याचे समोर आले. त्यामुळे शासनाने मंदिरे ही प्रशासकाच्या स्वाधीन न करता ती भक्तांच्या स्वाधीनच करावीत ! – संपादक)

प्राथमिक माहितीनुसार देवस्थानाच्या प्रशासक कार्यकाळात नोव्हेंबर २०२३ ते जुलै २०२५ या कालावधीत देवस्थानाच्या निधीतून ५५ लाख रुपयांचा धनादेश कोणत्याही कायदेशीर संमतीविना नियमांचे उल्लंघन करून कंत्राटदाराला देण्यात आला. देवस्थानासाठी दान करण्यात आलेल्या विविध भूमींच्या संदर्भातही मोठा अपहार झाल्याचा आरोप आहे.