नारद म्हणाले, ‘रामा, मला तुमच्या पादपद्मी (चरणी) शुद्ध भक्ती द्या आणि मी तुमच्या ‘भुवनमोहिनी मायेने मुग्ध न व्हावे’, असे करा.’ श्रीराम म्हणाले, ‘तथास्तु, आणखी काही माग.’ नारद म्हणाले, ‘मला दुसरे काही नको. केवळ शुद्ध भक्ती हवी.’

‘जहाज कुठल्याही दिशेने जात असले, तरी होकायंत्राचा काटा नेहमी दक्षिण-उत्तर या दिशांकडेच असतो; म्हणून जहाजाची कधी दिशाभूल होत नाही. त्याचप्रमाणे माणसाचे चित्त जर भगवंताकडे लागलेले असेल, तर त्याला या भवसागरात मग्न होण्याची भीती रहात नाही.’

चित्त शुद्ध झाले, तर त्यात भगवद्भक्ती उत्पन्न होते. भगवंताचे नामस्मरण करून, देह आणि मन शुद्ध करून घ्या. त्याच्या पावन नामगुणगानाने जिव्हा पवित्र करून घ्या.

राजाजवळ जायचे असल्यास अगोदर द्वारपाल, पहारेदार, शिपाई, मंत्री इत्यादींना प्रसन्न करावे लागते, तसेच राजाधिराज परमेश्वराजवळ जायचे असल्यास ‘साधन म्हणजे भजन, भक्तसेवा आणि साधूसंग’, असे अनेक उपाय करावे लागतात.’

‘ब्रह्म आणि शक्ती अभिन्न आहेत. वस्तू एकच असते, जेव्हा ती निष्क्रीय असते. सृष्टी, स्थिती आणि प्रलय यांचे कार्य करत असते, तेव्हा आपण तिला शक्ती म्हणतो.’