१ लाख २५ सहस्र रुपयांची लाच मागणारा ठाणे येथील कार्यालय अधीक्षक कह्यात

ठाणे, १६ जुलै (वार्ता.) – ‘युनिटी इंडस्ट्रियल पार्क प्रिमायसेस को-ऑपरेटिव्ह सोसायटी’ची नोंदणी करून देण्यासाठी १ लाख २५ सहस्र रुपयांची लाच मागितल्याप्रकरणी ठाणे सहकारी संस्थेच्या जिल्हा उपनिबंधक कार्यालयातील अधीक्षक सुधाकर बळीराम राठोड याला लाचलुचपत प्रतिबंधक विभागाने कह्यात घेतले आहे. तक्रारदाराने ६ एप्रिल २०२६ या दिवशी दिलेल्या तक्रारीनंतर ६ आणि ७ एप्रिलला झालेल्या पडताळणीत राठोड यांनी वरिष्ठ अधिकार्‍यांसाठी १ लाख रुपये आणि स्वतःसाठी २५ सहस्र रुपये, अशी एकूण १ लाख २५ सहस्र रुपयांच्या लाचेची मागणी केल्याचे निष्पन्न झाले आहे. (अशा लाचखोरांची सर्व संपत्ती जप्त करून त्यांना कठोर शिक्षा करायला हवी. – संपादक) या प्रकरणी नौपाडा पोलीस ठाणे येथे भ्रष्टाचार प्रतिबंधक कायद्याच्या अंतर्गत गुन्हा नोंद करण्यात आला असून पुढील अन्वेषण पोलीस करत आहेत.