युवतींनी स्वसंरक्षणाची कला आत्मसात करावी ! – कु. क्रांती पेटकर, रणरागिणी शाखा

पुणे, २७ डिसेंबर (वार्ता.) – आज महिला सशक्तीकरण होत असून महिला आणि युवती विविध क्षेत्रांत पुढाकार घेऊन कार्यरत असतांना आपल्याला दिसतात. सशक्तीकरणाच्या समवेतच महिलांनी धर्माचरणही केले पाहिजे. महिलांवर होणारे अत्याचार पहाता आजच्या युवतींनी स्वसंरक्षणाची कलाही आत्मसात करावी, असे प्रतिपादन रणरागिणी शाखेच्या कु. क्रांती पेटकर यांनी केले. सोरतापवाडी (पुणे) येथे नुकतेच सौ. आश्लेषा चोरघे यांच्या ‘नृत्य आविष्कार डान्स अकॅडमी’च्या वतीने आयोजित करण्यात आलेल्या  ‘डान्स फेस्टिवल – २०२५’मध्ये त्या बोलत होत्या. या कार्यक्रमाला ‘नुपूर झंकार अकॅडमी’च्या सौ. रूपाली जोशी, ‘सारेगमप’मधील विजेती कार्तिकी गायकवाड उपस्थित होत्या.

कार्यक्रमाच्या आरंभी नटराजाच्या मूर्तीचे पूजन करण्यात आले. अकॅडमीच्या वार्षिक संमेलनानिमित्त विद्यार्थ्यांचे नृत्य सादरीकरण करण्यात आले आणि त्यांना स्मृतीचिन्ह अन् प्रमाणपत्र देण्यात आले.