‘पितृपक्षात ‘ॐ ॐ श्री गुरुदेव दत्त ॐ ।’ या दत्तगुरूंच्या नामजपाचा पितरांवर, तसेच स्वतःवर काय परिणाम होतो ?’, याचे श्री. राम होनप यांनी केलेले सूक्ष्म परीक्षण !

‘परात्पर गुरु डॉ. आठवले यांनी ‘पितरांपासून व्यक्तीला होणारे त्रास दूर होणे आणि पितरांना पुढील गती मिळणे’, यांसाठी दत्तगुरूंचा नामजप करण्याचे महत्त्व वेळोवेळी सांगितले आहे. यासाठी सनातनच्या वतीने पितृपक्षात (८ सप्टेंबर ते २१ सप्टेंबर २०२५ या काळात) प्रतिदिन ‘ॐ ॐ श्री गुरुदेव दत्त ॐ ।’, हा नामजप न्यूनतम १ घंटा करण्यास सांगितला आहे.

१. ‘साक्षात् दत्तगुरु समोर उभे आहेत’, असा भाव ठेवून नामजप करणे

७.९.२०२५ या दिवशी हा नामजप करण्यापूर्वी ‘साक्षात् दत्तगुरु माझ्यासमोर उभे आहेत’, असा भाव ठेवून मी नामजप करण्यास प्रारंभ केला. तेव्हा माझ्या मनात विचार आला, ‘या नामजपाचा आमच्या पितरांवर काय परिणाम होतो ?’, हे सूक्ष्मातून पाहूया.’

२. ‘पितरांवर नामजपाचा काय परिणाम होतो ?’, याचे सूक्ष्म परीक्षण करतांना गुरुकृपेमुळे जाणवलेली सूत्रे

अ. दत्तगुरूंचा नामजप करतांना प्रारंभी मला सूक्ष्मातून ‘आमचे १० ते १५ पितर एका गटात उभे आहेत’, असे दृश्य दिसले. त्यांतील बहुतेक पुरुषांचा पोषाख ‘पांढरे धोतर, पांढरा सदरा आणि डोक्यावर फेटा’, असा होता, तर स्त्रियांनी नऊवारी साडी नेसली होती. तेथे ४ – ५ वर्षांचे एक लहान मूलही दिसले.

आ. नंतर ‘आमच्या पितरांपैकी एका पितराने ओंजळीने पाणी पितांना दोन्ही हात करतात, तसे हात करून काहीतरी भक्षण करण्याची कृती केली’, असे दृश्य मला सूक्ष्मातून दिसले. त्या वेळी ‘मी करत असलेल्या नामजपातील शक्ती ते पितर ग्रहण करत आहेत’, असे मला जाणवले.

इ. दत्तगुरूंच्या नामजपाच्या शक्तीमुळे एका पितराभोवती पांढरे सुरक्षाकवच निर्माण झालेले दिसले. सूक्ष्म लोकांत अनिष्ट शक्ती पितरांना त्रास देऊ शकतात. त्यांच्यापासून रक्षण व्हावे, यासाठी त्या पितराभोवती सुरक्षाकवच निर्माण झाले.

ई. एक पितर तटस्थपणे उभे असलेले दिसले. त्यांना ‘दत्तगुरूंचा नामजप आणि स्वतःला पुढील गती मिळणे’, यांत काही स्वारस्य नव्हते.

उ. ज्याप्रमाणे व्यक्तीला कडक ऊन सहन न झाल्यास ती भोवळ येऊन खाली पडते, त्याप्रमाणे एक पितर अकस्मात् खाली कोसळतांना दिसले. तेव्हा ‘त्या पितरांना दत्तगुरूंच्या नामजपातील शक्ती सहन न झाल्याचे हे दर्शक आहे’, असे मला जाणवले.

ऊ. एक पितर मुक्ती मिळण्यासाठी हात जोडून दत्तगुरूंकडे याचना करतांना दिसले.

३. नामजपाचा ‘सूक्ष्मातून स्वतःवर काय परिणाम होतो ?’, असा विचार मनात आल्यावर ‘शरिरातील काळे कण नष्ट होऊन पिवळ्या दैवी कणांची निर्मिती होत आहे’, असे दिसणे

दत्तगुरूंच्या नामजपाचा ‘सूक्ष्मातून स्वतःवर काय परिणाम होतो ?’, असा विचार माझ्या मनात आला. तेव्हा माझ्या शरिरात पितृदोषाशी संबंधित काळे कण दिसले. दत्तगुरूंचा भावपूर्ण नामजप केल्यावर माझ्या शरिरात पिवळ्या दैवी कणांची निर्मिती होऊ लागली. या दैवी कणांमुळे ते काळे कण नष्ट होऊ लागले. यातून ‘या नामाद्वारे पितृदोष न्यून होतो’, हे माझ्या लक्षात आले .

कृतज्ञता : वरील सूक्ष्म परीक्षणाद्वारे मला ‘परात्पर गुरु डॉक्टरांनी दत्तगुरूंविषयी केलेले मार्गदर्शन आणि ‘ॐ ॐ श्री गुरुदेव दत्त ॐ ।’ हा नामजप’, यांचे महत्त्व समजले. याबद्दल मी परात्पर गुरु डॉक्टर आणि दत्तगुरु यांच्या चरणी कृतज्ञता व्यक्त करतो.’

– श्री. राम होनप (सूक्ष्मातून प्राप्त झालेले ज्ञान), सनातन आश्रम, रामनाथी, गोवा. (१०.९.२०२५)