श्री विठ्ठल-रुक्मिणी मंदिर समितीच्या अपीलाची सुनावणी अन्य जिल्हा न्यायाधीश यांचेकडे वर्ग होणार !

पंढरपूर – श्री विठ्ठलाच्या मूर्तीला रासायनिक लेपनाला स्थगिती देण्याच्या पंढरपूर येथील मे. दिवाणी न्यायाधीश कनिष्ठ स्तर या न्यायालयाने दिलेल्या निकालाच्या विरोधात श्री विठ्ठल-रुक्मिणी मंदिर समितीने जिल्हा न्यायालयात दिवाणी किरकोळ अपील केले आहे. हे अपील ज्या न्यायाधिशांसमोर चालणार आहे त्या ए.एस्. सलगर यांच्या न्यायालयाने यापूर्वी दिलेल्या निकालाची प्रत या प्रकरणाच्या कादगपत्रांमध्ये पुरावा म्हणून जोडण्यात आलेली आहे. त्यामुळे हे प्रकरण अन्य न्यायालयाकडे वर्ग करण्यात यावे, अशी विनंती प्रतिवादींच्या वतीने अधिवक्ता सुधीर रानडे यांनी केली आहे. त्यावर न्यायाधिशांनी श्री विठ्ठल-रुक्मिणी मंदिरा समितीच्या अपीलाची सुनावणी अन्य कोणत्याही सक्षम जिल्हा न्यायालयाकडे वर्ग करण्यासाठी जिल्हा आणि सत्र न्यायाधीश यांच्याकडे विनंतीपत्र पाठवण्यात येईल, असा आदेश दिला आहे.

न्यायाधीश ए.एस्. सलगर यांनी दिलेल्या आदेशात पुढील गोष्टी नमूद केल्या आहेत. संबंधित विषयावर यापूर्वी आदेश देतांना न्यायालयाने आपले मत व्यक्त केलेले आहे, तसेच प्रतिवादींना या न्यायालयासमोर पुढील सुनावणी नको असल्याचे आवेदनातील लिखाणावरून दिसून येते. या पार्श्वभूमीवर न्यायालयाने सदर अपीलाची सुनावणी स्वतःकडे चालू ठेवणे उचित ठरणार नाही. त्यामुळे हे प्रकरण अन्य कोणत्याही सक्षम जिल्हा न्यायालयाकडे वर्ग करण्यासाठी जिल्हा आणि सत्र न्यायाधीश यांच्याकडे विनंतीपत्र पाठवण्यात येईल, असा आदेश दिला आहे.