China Operation Sindoor : ‘ऑपरेशन सिंदूर’च्या वेळी चीनने पाकिस्तानला सैनिकी साहाय्य केल्याचा दावा चीनने अप्रत्यक्ष फेटाळला

बीजिंग (चीन) – भारतीय सैन्याचे उपप्रमुख लेफ्टनंट जनरल राहुल आर्. सिंह यांनी नुकतेच म्हटले होते की, ‘ऑपरेशन सिंदूर’च्या वेळी चीनने पाकिस्तानला सक्रीय सैनिकी साहाय्य केले होते. यावर चीनच्या परराष्ट्र मंत्रालयाने प्रतिक्रिया व्यक्त केली आहे.  चीनच्या परराष्ट्र मंत्रालयाच्या प्रवक्त्या माओ निंग यांना याविषयी विचारण्यात आल्यावर त्यांनी, ‘तुम्ही उल्लेख केलेल्या विशेष सूत्राविषयी मी परिचित नाही. मी एवढेच सांगू इच्छिते की, चीन आणि पाकिस्तान यांमध्ये पारंपरिक मैत्री असून त्यांचे संरक्षण अन् सुरक्षा सहकार्य कोणत्याही तृतीय पक्षाला लक्ष्य करण्यासाठी नाही’, असे सांगत चीनने पाकला साहाय्य केल्याचे नाकारले.

माओ निंग पुढे म्हणाल्या की, हे आरोप कसे निर्माण झाले, याविषयी मला ठाऊक नाही. वेगवेगळ्या लोकांचे वेगवेगळे दृष्टीकोन असू शकतात. मी एवढेच म्हणू शकते की, चीन-पाकिस्तान संबंध हे कोणत्याही तिसर्‍या देशाला लक्ष्य करणारे नाहीत. भारत आणि पाकिस्तान हे अशा प्रकारचे शेजारी आहेत, ज्यांना वेगळे करता येत नाही. हे दोघेही चीनचे महत्त्वाचे शेजारी आहेत.