Russia Sells Gold : रशियाने गेल्या ६ मासांत विकले ४४ टन सोने !

मॉस्को (रशिया) –  गेल्या ६ मासांत रशियाने तब्बल ४४ टन (अनुमाने ४४ सहस्र किलो) सोन्याची विक्री केल्याची माहिती ‘रशियन मध्यवर्ती बँके’च्या अहवालात उघड झाली. यामुळे आगामी काळात सोन्याच्या दरात मोठी घसरण होण्याची शक्यता व्यक्त केली जात आहे. सोन्यामध्ये इतिहासातील ही सर्वांत मोठी उलथापालथ असेल. जगात सर्वाधिक सोन्याचा साठा असलेल्या देशांमध्ये रशियाचा क्रमांक वरचा आहे.

जुलै २०२६ च्या आरंभी रशियाकडे २ सहस्र २८२ मेट्रिक टन सोन्याचा साठा शेष असून वर्षाच्या आरंभीच्या साठ्याच्या तुलनेत तो अनुमाने ४४ टन अल्प झाला आहे. युक्रेन युद्धानंतर लादलेल्या आर्थिक निर्बंधांमुळे महसुलावर ताण आल्याने रशियाने सोन्याची विक्री केल्याचे मानले जात आहे; मात्र हे सोने नेमके कुणाला विकले ?, याविषयी रशियन प्रशासनाने कोणतीही माहिती दिलेली नाही. सध्या रशियाकडे असलेल्या सोन्याची किंमत अंदाजे २९९ अब्ज डॉलर्स (अनुमाने २५ लाख कोटी रुपये) इतके आहे.

भारतात सोन्या-चांदीच्या किमतीत वाढ

भारतात सलग दुसर्‍या दिवशी देशांतर्गत बाजारात सोन्या-चांदीच्या किमतीत वाढ झाली. २४ कॅरेट सोन्याचा भाव १ लाख ४३ सहस्र रुपये प्रति १० ग्रॅम, तर चांदीचा भाव २ लाख २१ सहस्र रुपये प्रतिकिलो इतका होता.