राज्यातील सर्व ५२३ दस्त नोंदणी कार्यालये बंद !

पुणे – हवेली तालुक्यातील हवेली क्र. २० या दस्त नोंदणी कार्यालयातील सहदुय्यम निबंधकाला मारहाण केल्याच्या निषेधार्थ २० जुलै या दिवशी राज्यातील सर्व ५२३ दस्त नोंदणी कार्यालये बंद होती. या दिवशीच्या १० ते १२ सहस्र दस्तांची नोंदणी रखडल्याने राज्य सरकारचा २०० कोटी रुपयांचा महसूल बुडला. ‘आरोपींना अटक होईपर्यंत आंदोलन मागे घेणार नाही’, असा पवित्रा अधिकारी आणि कर्मचारी संघटनांनी घेतल्याने सरकारला या घटनेची नोंद घ्यावी लागली.

महसूलमंत्री चंद्रशेखर बावनकुळे यांनी ‘गुन्हेगार कुणीही असो, त्यांना शोधून योग्य ती शिक्षा देऊ’, असे आश्वासन दिले आहे. संघटनेच्या पदाधिकार्‍यासमवेत झालेल्या बैठकीत ते बोलत होते. २१ जुलै या दिवशी राज्यातील सर्व नोंदणी कार्यालये नेहमीप्रमाणे चालू होती.