Drone Attack On Russia : युक्रेनने रशियातील ३८ मजली इमारतीवर ड्रोन धडकावले ! : २ जण घायाळ

युक्रेनने रशियावर केलेले आक्रमण अमेरिका आणि युरोप यांना महागात पडेल !

अमेरिकेत ११ सप्‍टेंबर २००१ या दिवशी ‘विश्‍व व्‍यापार केंद्रा’च्‍या इमारतीवर जसे आक्रमण झाले, त्‍याची आठवण करून देणारे हे आक्रमण आहे. युक्रेनकडे असे अत्‍याधुनिक ड्रोन कुठून आले ? उत्तर आहे अमेरिका ! हा संघर्ष कोण पेटवत आहे ? त्‍याचे उत्तर आहे अमेरिका आणि ‘नाटो’ (उत्तर अटलांटिक सुरक्षा संघटना) ! रशिया-युक्रेन संघर्ष हा खर्‍या अर्थाने रशिया आणि अमेरिकापुरस्‍कृत ‘नाटो’मधील संघर्ष आहे. म्‍हणूनच तो २ वर्षांपासून चालू आहे. अशा आक्रमणांनी रशिया अधिक असुरक्षित होणार आणि कदाचित् आण्विक क्षेपणास्‍त्राने याचे प्रत्‍युत्तर देईल, जे युरोपला महागात जाईल.

हा संघर्ष वाढवून युरोपला काय साध्‍य होणार आहे ? आधीच युरोप याची मोठी किंमत चुकवत आहे. हे अमेरिकेलाही महागात जाणार; कारण या युद्धाने चीन आणि रशिया यांना जवळ आणले आहे, जे अमेरिकेसाठी धोक्‍याचे आहे. त्‍यामुळे हा प्रश्‍न शांतता आणि चर्चेच्‍या माध्‍यमातून सोडवला जावा, ही भारताची भूमिकाच योग्‍य आहे.

– डॉ. शैलेंद्र देवळाणकर, परराष्‍ट्र धोरणांचे विश्‍लेषक, पुणे. (२६.८.२०२४)