Congress MLA Raju Kage : (म्हणे) ‘उद्या जर पंतप्रधानांचा मृत्यू झाला, तर कुणीच पंतप्रधान होणार नाही का ?’ – काँग्रेसचे आमदार राजू केज

कर्नाटकातील काँग्रेसचे आमदार राजू केज यांचे संतापजनक वक्तव्य

बेळगाव (कर्नाटक) – येथील काँग्रेसचे आमदार राजू केज यांनी पंतप्रधान नरेंद्र मोदी यांच्याविषयी अत्यंत संतापजनक वक्तव्य केले आहे. जे तरुण मोदी यांचा जयघोष करतात, त्यांच्यावर टीका करतांना केज म्हणाले की, मी पदवीधर असून मला बुद्धी आहे. मी निरक्षर नाही. मीही देश चालवू शकतो, इतका आत्मविश्‍वास माझ्यात आहे. जर उद्या पंतप्रधानांचा मृत्यू झाला, तर कुणीच पंतप्रधान होणार नाही का ? या देशात १४० कोटी लोकसंख्या आहे. एवढ्या लोकांमध्ये पंतप्रधान होऊ शकणारी एकही व्यक्ती नाही का ?

आमदार केज यांच्या या टीकेनंतर भाजपकडून जोरदार प्रत्युत्तर देण्यात आले आहे.  ‘काँग्रेसचे नेते पंतप्रधानांच्या मरणाची वाट पहात आहेत का ?’, अशी प्रश्‍न भाजपने ‘एक्स’वरून विचारला आहे. काही दिवसांपूर्वीही केज यांनी पंतप्रधानांच्या जीवनशैलीवर टीका करत म्हटले होते की, पंतप्रधान महागड्या विमानातून प्रवास करतात. त्यांचे कपडे ४ लाख रुपयांचे असतात. विशेष म्हणजे केज हे आधी भाजपमध्येच होते. वर्ष २०१९ मध्ये त्यांनी काँग्रेसमध्ये प्रवेश केला आहे.