स्थानिक श्री बौगनाथ देवतेवरील श्रद्धा, तसेच ज्ञान आणि कर्म यांमुळे बचावकार्य यशस्वी ! – केंद्रीय मंत्री जनरल व्ही.के. सिंह

केळशी (गोवा) येथे ‘पांचजन्य’ नियतकालिकाकडून राष्ट्रीय परिसंवादाचे आयोजन !

मडगाव (गोवा), २५ डिसेंबर (वार्ता.) –  उत्तराखंड येथील सिल्कियारा बोगद्यात अडकलेल्या कामगारांच्या सुटकेचे बचावकार्य स्थानिक श्री बौगनाथ देवतेवरील श्रद्धा, तसेच ज्ञान आणि कर्म यांच्यामुळे यशस्वी झाले. केंद्रात पंतप्रधान नरेंद्र मोदी आल्यापासून भारताच्या परराष्ट्र धोरणात अमुलाग्र पालट झाले. त्यामुळेच वर्ष २०१५ मध्ये येमेनमधील युद्धसदृश परिस्थितीतून भारतियांना सुखरूप मायदेशी आणणारे ‘ऑपरेशन राहत’, तसेच वर्ष २०२२ मध्ये युक्रेनमधील भारतियांना भारतात आणण्यासाठी राबवलेले ‘ऑपरेशन गंगा’ या मोहिमा यशस्वी झाल्या. सप्टेंबर २०२३ मध्ये देहलीत झालेल्या ‘जी-२० परिषदे’चे सुयशही यामुळेच मिळाले, असे प्रतिपादन केंद्रीय रस्ते उभारणी आणि नागरी उड्डयन राज्य मंत्री जनरल व्ही.के. सिंह यांनी केली.

‘पांचजन्य’या हिंदुत्वनिष्ठ हिंदी नियतकालिकेकडून २४ डिसेंबर या दिवशी कमडगावजवळ असलेल्या केळशी येथील ‘नोवाटेल डोना सिल्व्हिया रिसॉर्ट’ येथे ‘सागरमंथन सुशासन संवाद २.०’ हा राष्ट्रीय स्तरावरील परिसंवाद आयोजित करण्यात आला होता. या कार्यक्रमाला गोवा राज्याचे मुख्यमंत्री प्रमोद सावंत, केंद्रीय मंत्री नितीन गडकरी आणि केंद्रीय मंत्री श्रीपाद नाईक यांनी संबोधित केले. या परिसंवादात ‘सांस्कृतिक प्रेरणा’, ‘स्वस्थ भारताचे सूत्र’, ‘राष्ट्र-धर्म’ आदी विषयांवर उपस्थित मान्यवरांनी संबोधित केले.
विश्‍व हिंदु परिषदेचे महामंत्री मिलिंद परांडे, कर्णावती (गुजरात) येथील प्रसिद्ध अस्थीरोगतज्ञ डॉ. केयूर बूच, देहलीतील अखिल भारतीय आयुर्विज्ञान संस्थानचे प्रसिद्ध वैद्य महेश व्यास, अमूल आस्थापनाचे प्रबंध निर्देशक जयेन मेहता, दीनदयाळ शोध संस्थानचे महासचिव अतुल जैन, संपर्क भारती या विदेशात कार्य करणार्‍या राष्ट्रनिष्ठ संघटनेचे कर्नल तेज कुमार टिक्कू, ‘पांचजन्य’चे मुख्य संपादक हितेश शंकर आदींनीही संबोधित केले.