गाझा हा काही बगीचा नव्हे, त्यामुळे येथे घुसणे महागात पडेल ! – हमासची इस्रायलला धमकी

इस्रायल गाझा पट्टीत सैन्य घुसवण्याच्या सिद्धतेत !

तेल अवीव (इस्रायल) : इस्रायलने गाझामध्ये घुसण्याचा प्रयत्न करू नये. इस्रायली सैन्याला आम्ही घाबरत नाही. गाझा म्हणजे काही बगीचा नव्हे, येथे घुसणे महागात पडेल, अशी धमकी हमासने इस्रायलला दिली. इस्रालयने गाझा पट्टीत सैन्य घुसवण्याचे घोषित केल्यानंतर ही धमकी देण्यात आली. इस्रायल आणि हमास यांच्या युद्धात आतापर्यंत ४ सहस्र लोकांचा मृत्यू झाला आहे. इस्रायलकडून चालू असलेल्या भीषण आक्रमणात गाझा पट्टीमध्ये मोठ्या प्रमाणात विनाश होत आहे.

 (सौजन्य : Zee News)

आम्ही इस्रायलची ‘सुपर पॉवर’ (महान शक्ती) ही प्रतिमा धूळीस मिळवली !

हमासने म्हटले आहे की, आम्ही इस्रायलमध्ये १ सहस्र २०० योद्धे पाठवले होते. आमची संघटना भक्कम आहे. इस्रायली सैनिकांना आम्ही घाबरत नाही. गाझामध्ये इस्रायली सैनिकांचा सामना करण्यासाठी आम्ही सज्ज आहोत. गाझामध्ये इस्रायलकडून बाँबफेक चालू आहे. तरीही आम्ही घाबरत नाही. आम्ही दृढ लोक आहोत. हा आमचा दृढसंकल्प आहे. आमच्याजवळ पुष्कळ योद्धे आहेत. तसेच अनेक लोकांचा आम्हाला पाठिंबा आहे. आम्हाला कसलीच काळजी नाही. जॉर्डन आणि लेबेनॉन येथील नागरिक आमच्यासमवेत आहेत. या आक्रमणामुळे इस्रायलची प्रतिमा मलिन झाली आहे. आम्ही इस्रायलची सुरक्षा व्यवस्था भेदण्यात यश मिळवले आहे. इस्रायलची ‘सुपर पॉवर’ (महान शक्ती) ही प्रतिमा आम्ही धूळीस मिळवली आहे. आम्ही इस्राइलच्या गुप्तचर खात्याला अपयशी ठरवले आहे.