पुणे – गुजरात पोलिसांनी १३ डिसेंबर या दिवशी पाकिस्तानी गुप्तचर संस्था आय.एस्.आय.साठी काम करणार्‍या सुरत येथील दीपक साळुंखे याला अटक केली आहे. पुण्यातील दक्षिण मुख्यालयाच्या लष्करी गुप्तचर विभागाने दिलेल्या माहितीच्या आधारे ही कारवाई गुजरातच्या सुरत गुन्हे शाखेने केली आहे. दीपक हा ‘साई फॅशन’ नावाचे दुकान चालवत होता. तो पाकिस्तानच्या हामिद आणि काशिफ या २ आय.एस्.आय. एजंटांच्या संपर्कात होता, तसेच त्यांना संवेदनशील माहिती पुरवण्याचे काम करत होता. पुढील कारवाईसाठी साळुंखे याला गुजरात पोलिसांच्या विशेष ऑपरेशन्स गटाकडे (एस्.ओ.जी.) सोपवण्यात आले आहे, असे लष्करी गुप्तचर विभागाने कळवले आहे. पाकिस्तान एजंट हमीद याने महिलेच्या नावाने ‘फेसबुक अकाऊंट’च्या माध्यमातून साळुंकेला ‘हनी ट्रॅप’मध्ये अडकवले. त्याचा विश्वास संपादन केल्यानंतर हमीदने स्वतःची खरी ओळख सांगितली.
