रशियाच्या सैनिकांचा खारकीवमधील सैन्य रुग्णालयावर आक्रमण

कीव (युक्रेन) – युक्रेनमधील खारकीव आणि खेरसन येथे मध्यरात्री भीषण लढाई चालू होती. रशियाच्या सैनिकांनी खारकीवमधील सैन्य रुग्णालयावर ‘पॅराट्रूपर्स’ उतरवले आणि जोरदार आक्रमण केले. या रुग्णालयात घायाळ झालेल्या युक्रेनच्या सैनिकांवर औषधोपचार चालू होते.

युक्रेनवासियांची चिवट झुंझ !

७ दिवस उलटून गेले, तरी युक्रेन रशियाच्या पूर्णपणे कह्यात आलेले नाही. त्यामुळे रशियाचे राष्ट्राध्यक्ष व्लादिमिर पुतिन यांनी युक्रेनवर अण्वस्त्र आक्रमण करण्यासाठी सैन्यतुकडीला सिद्ध रहाण्याचा आदेश दिला आहे. यामुळे या तुकडीने युद्धसराव करण्यास आरंभ केला आहे. ‘युक्रेन सहज हाती येईल’, असे पुतिन यांना वाटले होते; परंतु युक्रेनचे सैनिक आणि नागरिक यांच्या चिवट झुंझीमुळे रशियन सैन्याच्या कारवायांना खीळ बसली आहे.