छत्रपती शिवाजी महाराज यांचा पुतळा स्थापन केल्याप्रकरणी ३६ जणांवर गुन्हे नोंद !

केंजळ (सातारा) येथील छत्रपती शिवाजी महाराजांचा पुतळा बसवल्याचे प्रकरण

सातारा, १८ फेब्रुवारी (वार्ता.) – वाई तालुक्यातील केंजळ या गावी छत्रपती शिवाजी महाराज यांचा पुतळा स्थापन केला; म्हणून ३६ युवकांवर भुईज पोलीस ठाण्यामध्ये गुन्हा नोंद करण्यात आला आहे. या प्रकरणी आतापर्यंत २८ जणांना पोलिसांनी कह्यात घेतले असून त्यातील २२ जणांना २ दिवसांची पोलीस कोठडी ठोठावण्यात आली आहे. ११ फेब्रुवारीच्या रात्री केंजळ गावातील युवकांनी ग्रामपंचायत परिसरामध्ये चबुतरा बांधून छत्रपती शिवाजी महाराज यांचा पूर्णाकृती पुतळा स्थापन केला होता. यासाठी कोणतीही अनुमती घेण्यात आलेली नव्हती. याची माहिती मिळताच रीतसर अनुमती घेऊन पुतळा स्थापन करावा, अशी भूमिका प्रशासनाने घेतली; मात्र युवक आणि ग्रामस्थ त्यांच्या भूमिकेवर ठाम राहिले. १२ फेब्रुवारीला पोलीस बंदोबस्तामध्ये प्रशासनाने छत्रपती शिवाजी महाराज यांचा पुतळा हटवला.