होशंगाबाद (मध्यप्रदेश) येथे कोचिंग क्लासच्या संचालकाकडून विद्यार्थिनीचे लैंगिक शोषण !

शिक्षणक्षेत्राला काळीमा फासणारी घटना !

अशांवर तात्काळ खटला चालवून त्यांना फाशीची शिक्षा होणे आवश्यक ! असे झाले, तरच लैंगिक अत्याचारांचे प्रकार थांबतील ! – संपादक 

होशंगाबाद (मध्यप्रदेश) – एका अल्पवयीन विद्यार्थिनीचे अनेक मास लैंगिक शोषण केल्याच्या प्रकरणी येथील प्रसिद्ध ‘काशिव सर ॲकॅडमी’चा संचालक यु.के. काशिव याला अटक करण्यात आली आहे. विद्यार्थिनीला ‘तुझ्या आईचा अपघात घडवून तिला ठार मारणार’, अशी धमकी देऊन त्याने तिचे अनेक मास लैंगिक शोषण केले. या प्रकरणी आरोपीच्या विरोधात ‘पोक्सो’ कायद्याच्या अंतर्गत गुन्हा नोंदवण्यात आला आहे.

पोलिसांनी दिलेल्या माहितीनुसार काशिव हा पीडितेचे जानेवारीपासून लैंगिक शोषण करत होता. २२ सप्टेंबर या दिवशी आरोपीने पीडितेशी असभ्य वर्तन केल्यानंतर तिने घरी जाऊन कुटुंबियांना सर्व स्थिती कथन केली. कुटुंबियांनी पोलिसांकडे तक्रार केल्यानंतर त्यांनी आरोपीला अटक केली. पीडित मुलगी ११ वीची विद्यार्थीनी असून तिच्या वडिलांचे निधन झाले आहे.