महर्षि अध्यात्म विश्‍वविद्यालयाला ‘सुपरलेटिव्ह प्रेझेंटेशन अवॉर्ड’ (अत्युत्तम प्रस्तुतीकरण पारितोषिक) !

श्रीलंकेत आयोजित करण्यात आली  ७ वी ‘जागतिक महिला अभ्यास परिषद २०२१’

मुंबई – ‘दी इंटरनॅशनल इन्स्टिट्यूट ऑफ नॉलेज मॅनेजमेंट, श्रीलंका’ यांनी नुकत्याच ‘ऑनलाईन’ आयोजित केलेल्या ७ व्या ‘वर्ल्ड कॉन्फरन्स ऑन वूमन्स स्टडीज् २०२१’ (जागतिक महिला अभ्यास परिषद २०२१) या आंतरराष्ट्रीय परिषदेमध्ये महर्षि अध्यात्म विश्‍वविद्यालयाने सहभाग घेतला होता. विश्‍वविद्यालयाच्या अमेरिकेतील पू. (सौ.) भावना शिंदे यांनी ‘अलंकारांचा स्त्रियांवर आध्यात्मिक स्तरावर काय परिणाम होतो ?’, हा शोधनिबंध सादर केला होता. या शोधनिबंधाचे लेखक परात्पर गुरु डॉ. आठवले असून पू. (सौ.) भावना शिंदे या सहलेखिका आहेत. या शोधनिबंधाच्या प्रस्तुतीकरणाला या परिषदेने ‘सुपरलेटिव्ह प्रेझेंटेशन अवॉर्ड’ (अत्युत्तम प्रस्तुतीकरण पारितोषिक) दिले आहे.

या परिषदेतील सांस्कृतिक आदानप्रदानाच्या कार्यक्रमाच्या अंतर्गत महर्षि अध्यात्म विश्‍वविद्यालयाच्या वतीने एक व्हिडिओ दाखवण्यात आला. व्हिडिओच्या माध्यमातून संगीत आणि नृत्य यांचे प्रत्येकी एक सात्त्विक सादरीकरण अन् त्यांचा आध्यात्मिक स्तरावर होणारा परिणाम यांविषयी संशोधनावर आधारित माहिती दाखवण्यात आली होती. गळ्यातील ३ प्रकारच्या हारांचे ते परिधान करणार्‍यांवर होणारे सूक्ष्म परिणाम अभ्यासण्यासाठी प्रभावळ आणि ऊर्जा मापक यंत्र अन् सूक्ष्म परीक्षण यांच्या माध्यमातून केलेल्या संशोधनाची माहिती पू. (सौ.) भावना शिंदे यांनी उपस्थितांना दिली होती.

  • सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे सूक्ष्म. साधनेत प्रगती केलेल्या काही व्यक्तींना या सूक्ष्म संवेदना जाणवतात. या सूक्ष्माच्या ज्ञानाविषयी विविध धर्मग्रंथांत उल्लेख आहेत.
  • सूक्ष्म-परीक्षण : एखाद्या घटनेविषयी किंवा प्रक्रियेविषयी चित्ताला (अंतर्मनाला) जे जाणवते, त्याला सूक्ष्म-परीक्षण म्हणतात.