सनातन प्रभात > Post Type > बातम्या > राष्ट्रीय बातम्या > Bharuch Jama Masjid Row : भरूच (गुजरात) येथील जामा मशिदीच्या तळघरात देवतांच्या मूर्ती आढळल्या !

Bharuch Jama Masjid Row : भरूच (गुजरात) येथील जामा मशिदीच्या तळघरात देवतांच्या मूर्ती आढळल्या !

भरूच (गुजरात) – येतील ७०० वर्षे जुन्या असलेल्या जामा मशिदीच्या बंद (सील) केलेल्या तळघरात हिंदूंच्या देवतांच्या प्राचीन मूर्ती, यासह जैन तीर्थंकरांशी संबंधित मूर्तीही आढळल्याचे सांगण्यात येत आहे. अलीकडेच एक व्हिडिओ प्रसारित झाला होता. यामध्ये मशिदीच्या तळघरात हिंदूंच्या देवतांच्या अनेक प्राचीन मूर्ती, तसेच भगवान मल्लिनाथ (जैन धर्माचे १९ वे तीर्थंकर) यांची मूर्ती असल्याचा दावा करण्यात आला होता. हा व्हिडिओ मोठ्या प्रमाणात प्रसारित झाल्यानंतर विविध हिंदु आणि जैन संघटनांनी या प्रकरणाच्या चौकशीची मागणी केली.

पुरातत्व विभागाकडून मशिदीची पहाणी !

यानंतर पुरातत्व विभागाच्या पथकाने कडेकोट सुरक्षाव्यवस्थेत मशिदीच्या परिसराची पहाणी केली. पाहणीच्या वेळी तळघराचे ध्वनीचित्रीकरण करण्यात आले. तेथे ‘संवत १२१३’ असे कोरलेली एक प्राचीन मूर्ती आणि अनेक खांबांवर पारंपरिक कोरीव कामाचे अवशेष आढळल्याचा दावा केला जात आहे. तथापि या दाव्यांना अद्याप अधिकृत दुजोरा मिळालेला नाही. त्यामुळे पुरातत्व विभागाच्या अंतिम अधिकृत अहवालाच्या आधारेच भविष्यात कायदेशीर कारवाई निश्चित केली जाईल, असे मानले जात आहे.

जामा मशीद ट्रस्टने दावा फेटाळला !

जामा मशीद ट्रस्टच्या पदाधिकार्‍यांनी हे सर्व दावे फेटाळून लावले आहेत. सरकारी नोंदी, वर्ष १९०७ चे ‘गॅझेट’ आणि वक्फ बोर्डाची कागदपत्रे यांमध्ये मशिदीचा इतिहास स्पष्टपणे नमूद असल्याचे त्यांचे म्हणणे आहे. धार्मिक भावना भडकवणार्‍या आणि अनावश्यक वाद निर्माण करणार्‍यांविरुद्ध कायदेशीर कारवाई करण्याचा विचार करत असल्याचे ट्रस्टने म्हटले आहे.

पुरातत्व विभागाने अवैध वजूखाना (नमाजापूर्वी हात-पाय धुण्याची जागा) हटवला !

याच काळात पुरातत्व विभागाने मशिदीच्या आवारात अनुमतीविना बांधलेला अतिरिक्त ‘वजूखाना’ हटवला आहे. तसेच, एका वादग्रस्त प्रवेशद्वार बंद (सील) करण्यात आले आहे. संरक्षित स्मारकांशी संबंधित नियमांचे पालन सुनिश्चित करण्यासाठी हे पाऊल उचलल्याचे विभागाने स्पष्ट केले आहे.

हे श्री चक्रधर स्वामींचे जन्मस्थान ! – महंत मुक्तानंद स्वामी

या प्रकरणी शंकराचार्य मठाचे महंत मुक्तानंद स्वामी म्हणाले की, या शोधामुळे मी पूर्वी केलेल्या दाव्यांना बळकटी मिळाली आहे. हे ठिकाण एकेकाळी जैन धर्माचे ‘जैन समरी विहार’ म्हणून ओळखले जात होते, तसेच हे श्री चक्रधर स्वामींचे जन्मस्थान असल्याचेही मानले जाते.

संपादकीय भूमिका

  • पूर्वी मुसलमान आक्रमकांनी हिंदूंची मंदिरे पाडून तेथे मशिदी उभारल्याच्या असंख्य घटना घडल्या आहेत. त्या दृष्टीने या मशिदीचेही सर्वेक्षण होऊन सत्य जनतेसमोर आले पाहिजे !
  • एकेका मंदिरासाठी हिंदूंना द्यावा लागणारा लढा पहाता जनतेसमोर सत्य मांडण्यासाठी सरकार एकाच वेळी अशा वास्तूंचे सर्व्हेक्षण का करत नाही ?

नूतन लेख