महिला रुग्णाकडून लाच घेतांना कामथे उपजिल्हा रुग्णालयातील महिला डॉक्टरला पकडले

चिपळूण – गर्भपात करण्यासाठी आवश्यक असणारे किट (गोळ्या) देण्यासाठी ४ सहस्र ५०० रुपयांची लाच घेतांना कामथे उपजिल्हा रुग्णालयाच्या वैद्यकीय अधिकारी डॉ. कांचन शिरीष मदार (पागमळा, चिपळूण) यांना लाचलुचपत प्रतिबंधक विभागाच्या अधिकार्‍यांनी पकडले.

१. कामथे उपजिल्हा रुग्णालयातील स्त्रीरोगतज्ञ डॉ. कांचन मदार यांच्याकडे ३ जून या दिवशी एक महिला रुग्ण आली होती. या महिलेला गर्भपात करायचा होता. त्यासाठी तिने डॉ. मदार यांची भेट घेतली.

२. गर्भपात करण्यासाठी आवश्यक असणारे किट (गोळ्या) हवे असेल, तर पैसे द्यावे लागतील, असे सांगून डॉ. मदार यांनी त्या महिलेकडे ४ सहस्र ५०० रुपयांची मागणी केली.

३. संबंधित रुग्ण महिलेने लाचलुचपत प्रतिबंधक विभागाकडे तक्रार प्रविष्ट केली. रुग्ण महिला पैसे देण्यासाठी डॉ. मदार यांच्याकडे येणार होती. ठरलेल्या जागेवर पैसे देण्यात येणार होते. त्यानुसार सापळा लावून त्यांना पकडण्यात आले.

४. चिपळूण मध्यवर्ती बसस्थानक परिसरात डॉ. मदार यांनी संबंधित रुग्ण महिलेला स्वतःच्या खासगी चारचाकी गाडीमध्ये घेतले. त्यांनी रुग्णाकडून ४ सहस्र ५०० रुपये घेतांना लाचलुचपत प्रतिबंधक विभागाच्या अधिकार्‍यांनी त्यांना पकडले.