Insulting Raigad Fort : रायगडावर मद्याच्या ५० हून अधिक रिकाम्या बाटल्यांचा खच !

महाड (जिल्हा रायगड) – किल्ले रायगडावर पर्यटक मद्यधुंद मेजवान्या करत असल्याचे उघडकीस आले आहे. गडाच्या परिसरात मद्याच्या ५० हून अधिक रिकाम्या बाटल्यांचा खच पडलेला दिसला. यावर गडप्रेमी, स्थानिक नागरिक आणि शिवभक्त यांनी संताप व्यक्त केला. मद्याच्या बाटल्यांसह प्लास्टिकचा कचरा आणि मोठ्या प्रमाणात अस्वच्छताही दिसून आली.

🚨 Insult to Raigad Fort!

Over 50 empty liquor bottles found dumped at the historic fort of Chhatrapati Shivaji Maharaj.

Tourists are holding drunken parties at this sacred symbol of Hindu Swarajya.

The repeated neglect and desecration of Shivaji Maharaj’s forts expose the… pic.twitter.com/riZccaUGfV

— Sanatan Prabhat (@SanatanPrabhat) May 18, 2026

गडाच्या मुख्य प्रवेशद्वारांवर पर्यटक आणि त्यांचे साहित्य यांची काटेकोर पडताळणी केली जात नसल्यानेच असे प्रकार होत असल्याचा आरोप शिवप्रेमींनी केला आहे. ‘गडावर जाणार्‍या प्रत्येक पर्यटकाची प्रवेशद्वारावर कसून पडताळणी व्हावी. गडावरील सुरक्षारक्षकांची संख्या तातडीने वाढवण्यात यावी. गड परिसरात आणि मुख्य ऐतिहासिक वास्तूंच्या मागे सीसीटीव्ही कॅमेरे बसवण्यात यावेत. गडावर दारूबंदीचे फलक लावून नियमांचे उल्लंघन करणार्‍यांवर गुन्हे नोंदवून कठोर कारवाई व्हावी’, अशा मागण्या शिवभक्त आणि स्थानिक यांनी केल्या आहेत.

महाराष्ट्रातील गड-दुर्गांवर अपप्रकार चालू असल्याची गेल्या २ वर्षांतील काही उदाहरणे !

डिसेंबर २०२५ : सिंहगडावर जात असलेल्या एका चारचाकी गाडीतून मद्याच्या बाटल्या जप्त करण्यात आल्या होत्या.

ऑक्टोबर २०२५ : भोर (जिल्हा पुणे) येथील रायरेश्वर गडाजवळ काही लोक मद्य प्राशन करत असल्याचे समोर आले होते.

जुलै २०२४ : विशाळगडावर प्रचंड प्रमाणात कचरा आढळल्याने व्यापक आंदोलन करण्यात आले होते.