J&K Teacher Arrested : जम्मू-काश्मीरमध्ये सरकारी शिक्षक मश्कूर अहमद याला अटक !

श्रीनगर (जम्मू-काश्मीर) – जम्मू-काश्मीरमधील किश्तवाडमध्ये पोलिसांनी मश्कूर अहमद उपाख्य मश्कूर मास्टर नावाच्या सरकारी शिक्षकाला नुकतीच अटक केली.  मश्कूर अहमदने ‘जैश-ए-महंमद’ या आतंकवादी संघटनेच्या आतंकवाद्यांना आश्रय देण्यासह त्यांना इतर सुविधा पुरवल्या आहेत, असे पोलिसांनी सांगितले. ‘जैश-ए-महंमद’चा कमांडर सैफुल्ला बलूची याचे एक छायाचित्र आरोपीच्या घराच्या आत काढण्यात आले होते, असे अन्वेषणात समोर आले आहे. या छायाचित्रामध्ये आतंकवाद्याच्या गळ्यात नोटांचा हार दिसत आहे.

२२ फेब्रुवारी या दिवशी चतरू येथे राबवण्यात आलेल्या ‘ऑपरेशन त्राशी-२’च्या वेळी सैफुल्ला बलूची त्याच्या २ पाकिस्तानी साथीदारांसह मारला गेला होता. यानंतर त्याच्याविषयी केलेल्या अन्वेषणात त्याचे धागेदोरे मश्कूर अहमदशी जुळल्याचे उघड झाले. त्यानंतर चौकशीअंती मश्कूर अहमद याला अटक करण्यात आली. या प्रकरणी पोलीस पुढील अन्वेषण करत आहेत.