Female Suicide Squads : महिला आत्मघातकी पथकांच्या माध्यमातून जम्मू-काश्मीरमध्ये आक्रमणाचे आतंकवाद्यांचे षड्यंत्र

चंडीगड (पंजाब) – पाकिस्तानी आतंकवादी संघटना ‘जैश-ए-महंमद’ आणि ‘लष्कर-ए-तोयबा’ या आतंकवादी संघटना महिला आत्मघातकी पथकांसाठी मोठ्या प्रमाणावर भरती करत आहेत. जम्मू-काश्मीरमध्ये आक्रमण करण्यासाठी ही महिला आत्मघातकी पथके सिद्ध करण्यात येत आहेत. या महिला आत्मघातकी पथकांच्या एका महत्त्वाच्या बैठकीविषयी गुप्तचर माहिती आणि छायाचित्रे प्राप्त झाली आहेत. ही आत्मघातकी पथके सिद्ध करण्याचे दायित्व ‘जमात-उल्-मोमिनात’ या ‘जैश-ए-महंमद’च्या महिला शाखेकडे सोपवण्यात आले आहे. या आतंकवाद्यांनी अमरनाथ यात्रेच्या महत्त्वाच्या ठिकाणांची टेहळणी केल्याचे समोर आले आहे. या प्रकरणी सीमा सुरक्षादल सतर्क झाले असून नुकतेच श्रीनगरमध्ये एका महिलेसह ४ आतंकवाद्यांना अटक करण्यात आली.

गुप्तचर संस्थांशी संबंधित अधिकार्‍यांनी दिलेल्या माहितीनुसार, १८ एप्रिलला पाकिस्तानात आयोजित करण्यात आलेल्या महिला आत्मघातकी पथकांची भरती आणि प्रशिक्षण शिबिरे यांविषयीचे सविस्तर तपशील केंद्रीय सुरक्षादलांकडे यापूर्वीच सुपुर्द करण्यात आले आहे. पाकिस्तानच्या सैन्यदलाचेही संपूर्ण लक्ष सध्या महिला आत्मघातकी पथके सिद्ध करण्यावर केंद्रित झाल्याची माहिती या सूत्रांनी दिली.