परळी (बीड) येथे शिक्षणासाठी विद्यार्थ्यांचे आंदोलन !

बीड – जिल्ह्यातील परळी येथील वैद्यनाथ विद्यालयात गेल्या महिनाभरापासून नियमित अध्यापन पूर्णपणे बंद असल्याने संतापलेल्या विद्यार्थ्यांनी १६ जुलै या दिवशी शाळेच्या मैदानात उतरून ‘आम्हाला शिक्षण द्या, आमचे तास घ्या’, अशी घोषणा देत आंदोलन केले. विद्यालयात एकूण १६ शिक्षक कार्यरत असतांना आंदोलनाच्या दिवशी केवळ ८ शिक्षकच उपस्थित होते, तसेच शाळेत कायमस्वरूपी मुख्याध्यापक नसल्याने संपूर्ण प्रशासकीय कारभार विस्कळीत झाला आहे. शिक्षकांचे समायोजन आणि गेल्या ६ महिन्यांचे वेतन न मिळाल्याने शिक्षकांमध्ये तीव्र असंतोष आहे. संस्थाचालक आणि प्रशासन यांच्या या भोंगळ कारभारामुळे शिक्षकांनी शाळा आणि विद्यार्थी यांना वार्‍यावर सोडले आहे.