US Caused Pollution : अमेरिकेने केलेल्या प्रदूषणामुळे जगाची ८३० लाख कोटी रुपयांची हानी !

गरीब आणि विकसनशील देश यांच्यावर सर्वांत वाईट परिणाम

वॉशिंग्टन (अमेरिका) – ‘नेचर जर्नल’मध्ये प्रकाशित झालेल्या संशोधनानुसार ‘ग्लोबल वॉर्मिंग’शी संबंधित आर्थिक परिणामांमध्ये अमेरिका सर्वांत मोठा भागीदार आहे. अमेरिकेच्या कार्बन उत्सर्जनामुळे वर्ष १९९० पासून जगाला अनुमाने १० ट्रिलियन  डॉलरची अर्थात् ८३० लाख कोटी रुपयांची आर्थिक हानी झाली आहे. या हानीचा सर्वांत मोठा भार गरीब आणि विकसनशील देश यांच्यावर पडला आहे. भारताला अनुमाने ५०० अब्ज डॉलरची, म्हणजे ४१ लाख ५० सहस्र कोटी रुपयांची, तर ब्राझिलला अनुमाने ३३० अब्ज डॉलरची (२७ लाख ३९ सहस्र कोटी रुपयांची) हानी सोसावी लागली आहे.

शास्त्रज्ञांचे म्हणणे आहे की, वाढत्या तापमानामुळे उत्पादकता, आरोग्य आणि आर्थिक विकास यांच्यावर परिणाम झाला आहे. यामुळे अनेक देशांची वाढ मंदावली आहे. तथापि या हानीचा काही भाग अमेरिकेने स्वतःही सोसला आहे; परंतु एकूण परिणामांच्या तुलनेत तो अल्प आहे.