Denigration Sadhu MH Govt : हिंदु साधू-संतांचे विडंबन करणारे विज्ञापन सरकारने मागे घेतले !

दोषींवर कठोर कारवाई करण्याची हिंदु जनजागृती समितीची मागणी !

मुंबई, २६ फेब्रुवारी (वार्ता.) – स्वतःच्या कर्तृत्वावर विश्‍वास ठेवा, भोंदूगिरीवर नाही, असे लिखाण असलेल्या आणि साधू-संतांच्या वेषातील व्यंगचित्राद्वारे हिंदु धर्माचा अपमान करणार्‍या सामाजिक न्याय विभागाच्या वादग्रस्त विज्ञापनावरून राज्यात तीव्र संताप व्यक्त होत आहे. हिंदु जनजागृती समितीचे मुंबईचे श्री. सतीश सोनार यांनी सामाजिक न्यायमंत्री संजय शिरसाट यांची भेट घेऊन हे विज्ञापन तात्काळ मागे घेण्याची आणि दोषींवर कठोर कारवाई करण्याची मागणी केली होती.

या वेळी मंत्री म्हणाले, ‘‘हे विज्ञापन रात्रीच मागे घेण्यात आले आहे. हे विज्ञापन आमच्या विभागाच्या वतीने काढण्यात आलेले नव्हते. माहिती व जनसंपर्क विभागाने ते प्रसिद्ध केले होते.’’

Government forced to withdraw an advertisement mocking Hindu Saints after massive outrage. 🚩@HinduJagrutiOrg demands strict action against the culprits

On one side, Maharashtra prepares to showcase the glory of Hindu Dharma at the Nashik Simhastha Kumbh Mela 🌊🕉️ on the… pic.twitter.com/OqXRZjMiIM

— Sanatan Prabhat (@SanatanPrabhat) February 26, 2026

महाराष्ट्र सरकारच्या सामाजिक न्याय व विशेष साहाय्य विभागाच्या नावाने प्रसिद्ध झालेल्या विज्ञापनात जटा, टिळा, रुद्राक्षमाळा, कवटी आणि लिंबू-मिरची यांसारखी प्रतीके दाखवून एका साधूंचे विडंबनात्मक व्यंगचित्र प्रसिद्ध करण्यात आले होते. त्यासह ‘नको भोंदूगिरी, घेऊ शिक्षणाची शिदोरी’, असे घोषवाक्य वापरून जाणीवपूर्वक हिंदु धर्माला लक्ष्य करण्यात आले होते.

हिंदुत्वनिष्ठ संघटनांचा तीव्र विरोध !

या चित्रणामुळे हिंदु साधू-संत आणि ऋषिमुनी यांच्या परंपरेचे अवमानकारक सादरीकरण झाल्याची भावना विविध हिंदुत्वनिष्ठ संघटनांनी व्यक्त केली आहे. हिंदु जनजागृती समितीचे राज्य संघटक श्री. सुनील घनवट यांनी सरकारकडे लेखी तक्रार करून दोषींवर कठोर कारवाई करण्याची मागणी केली आहे.

(हे विज्ञापन प्रकाशित करण्यामागे कुणाच्याही धार्मिक भावना दुखावण्याचा आमचा उद्देश नाही. विडंबन कसे झाले आहे, हे कळण्यासाठी ते प्रकाशित केले आहे, याची नोंद घ्यावी. – संपादक)