राज्यात मतदार सूचींच्या विशेष सखोल पुनरावलोकनाचा सुधारित कार्यक्रम घोषित !

मुंबई – महाराष्ट्रात अलीकडील अतीवृष्टीच्या पार्श्वभूमीवर महाराष्ट्राच्या मुख्य निवडणूक अधिकार्‍यांनी मतदार सूचींच्या सर्वेक्षणासाठी मुदतवाढीची केलेली विनंती भारत निवडणूक आयोगाने मान्य केली आहे. त्यानुसार राज्यातील मतदार सूचींच्या विशेष सखोल पुनरावलोकनाच्या (‘एस्.आय.आर्.’च्या) कार्यक्रमाचे सुधारित वेळापत्रक घोषित करण्यात आले आहे. यानुसार मतदान केंद्रस्तरीय अधिकार्‍यांच्या माध्यमातून गृहभेटीची मोहीम ३० जून ते ८ ऑगस्ट, मतदान केंद्रांचे सुसूत्रीकरण आणि पुनर्रचना ८ ऑगस्टपर्यंत पूर्ण करण्यात येईल.

१७ ऑगस्ट २०२६ या दिवशी प्रारूप मतदार सूची प्रसिद्ध केली जाईल. १७ ऑगस्ट ते १६ सप्टेंबर २०२६ या कालावधीत मतदारांकडून दावे आणि हरकती स्वीकारण्यात येतील. १७ ऑगस्ट ते १५ सप्टेंबर २०२६ या कालावधीत नोटिसा देणे, सुनावणी घेणे आणि दावे-हरकतींचा निपटारा करण्याची प्रक्रिया पार पडेल. १९ ऑक्टोबर २०२६ या दिवशी अंतिम मतदार सूची प्रसिद्ध करण्यात येणार आहे.