यंदा पालखी सोहळ्यात ५३ सहस्र वारकर्‍यांनी घेतला पुणे महापालिकेच्या आरोग्य सेवेचा लाभ !

पुणे – यावर्षी संतश्रेष्ठ ज्ञानेश्वर माऊली आणि जगद्गुरु संत तुकाराम महाराज पालखी सोहळ्यात पुणे महापालिकेच्या आरोग्य विभागाने ३ दिवस दिलेल्या आरोग्य सेवेचा लाभ वारीतील ५३ सहस्र ८१३ वारकर्‍यांनी घेतला. महापालिकेची प्रसुतीगृहे, दवाखाने, आयुष्मान आरोग्य मंदिरे, ३५ वैद्यकीय पथके आणि ‘हिंदुहृदयसम्राट बाळासाहेब ठाकरे आपला दवाखाना आरोग्य केंद्रा’वर आरोग्य पडताळणी, वजन, उंची आणि रक्तदाब पडताळणी करण्यात आली, तसेच रक्त, थुंकी (क्षयरोग), मलेरिया आणि मधुमेह यांसह विविध चाचण्या विनामूल्य करण्यात आल्या. वैद्यकीय उपचारांची आवश्यकता असलेल्या २१ वारकर्‍यांना रुग्णवाहिकेद्वारे कमला नेहरू रूग्णालयात भरती करण्यात आले. १ सहस्र २२४ वारकर्‍यांनी ‘फिजिओथेरपी सेवे’चा लाभ घेतला. पालखी मुक्काम स्थळी २५० मेडिकल किटचे वितरण करण्यात आले. १० सहस्र महिला वारकर्‍यांना ‘सॅनिटरी पॅड’चे वितरण करण्यात आले. भवानी पेठ, नाना पेठ येथे २४ घंटे वैद्यकीय सेवा उपलब्ध होती. पुणे ते पंढरपूर मार्गावर ४ स्वतंत्र वैद्यकीय पथके व रुग्णवाहिका कार्यरत रहाणार असल्याची माहिती पुणे महापालिकेचे आरोग्य प्रमुख आधुनिक वैद्य नीना बोराडे यांनी दिली.