सनातन प्रभात > Post Type > बातम्या > राष्ट्रीय बातम्या > सहारनपूर (उत्तरप्रदेश) येथील बसपचे माजी आमदार हाजी इक्बाल यांच्या २७६ कोटी रुपयांच्या मालमत्तेवर जप्तीची कार्यवाही चालू !

सहारनपूर (उत्तरप्रदेश) येथील बसपचे माजी आमदार हाजी इक्बाल यांच्या २७६ कोटी रुपयांच्या मालमत्तेवर जप्तीची कार्यवाही चालू !

गुंडगिरीद्वारे बळकावल्या होत्या मालमत्ता

बहुजन समाज पक्षाचे माजी आमदार हाजी इक्बाल

सहारनपूर (उत्तरप्रदेश) – बेकायदेशीर मार्गाने संपत्ती गोळा केल्याचा आरोप असलेले बहुजन समाज पक्षाचे माजी आमदार हाजी इक्बाल उपाख्य बाला यांच्या २७५ कोटी ९७  लाख रुपयांहून अधिक किमतीच्या ५६ मालमत्ता जप्त करण्याची कार्यवाही सहारनपूर जिल्हा प्रशासनाने चालू केली आहे. हाजी इक्बाल पसार असून ते दुबई येथे असल्याचा संशय आहे.

१. अधिकार्‍यांच्या म्हणण्यानुसार वर्ष २०२२ च्या प्रकरणातील सुनावणीत इक्बाल त्यांच्या सहकार्‍यांसह संघटित गुन्हेगारी टोळी चालवत असल्याचे उघड झाले.

२. ही टोळी वनक्षेत्रातून लाकूड चोरी आणि तस्करी, बेकायदेशीर खाणकाम आणि इतर बेकायदेशीर कृत्यांत सहभागी असल्याचे सांगितले जाते.

३. या टोळीने आर्थिक शक्तीचा वापर करून लोकांना धमकावले आणि फसवणूक करून शासकीय, तसेच खासगी भूमी खरेदी करून बेकायदेशीर कह्यात घेतल्या.

४. ही मालमत्ता केवळ इक्बाल यांच्या नावावरच नव्हे, तर त्यांची पत्नी, मुले, मुली, आश्रित असले कुटुंब, नोकर, सहकारी आणि अनेक बनावट आस्थापना यांच्या नावावर खरेदी करण्यात आली. या खरेदीसाठी गुन्हेगारी मार्गाने मिळविलेल्या पैशांचा वापर केल्याचा आरोप आहे.

५. वर्ष १९८९ पासून इक्बाल यांच्या विरोधात किमान ५२ गुन्हे नोंद झाले आहेत. त्यांपैकी ४१ प्रकरणे विविध न्यायालयांमध्ये प्रलंबित आहेत. या प्रकरणांमध्ये बनावट कागदपत्रे बनवणे, गुन्हेगारी धमकी, दरोडा, गुन्हेगारी कटकारस्थान आणि संबंधित इतर गंभीर आरोपांचा समावेश आहे.

संपादकीय भूमिका

  • कोट्यवधी रुपयांच्या मालमत्ता बळकावल्या जात असतांना पोलीस आणि प्रशासन काय करत होते ? त्यांच्यावरही कारवाई झाली पाहिजे !
  • एकेकाळी उत्तरप्रदेशात सत्तेत असलेल्या बसपमध्ये कशा प्रकारच्या भ्रष्टाचार्‍यांचा भरणा होता, हे अशा घटनांतून दिसून येते !

नूतन लेख