सनातन प्रभात > Post Type > बातम्या > आंतरराष्ट्रीय बातम्या > Chinese Scholars Bhagavad Gita : चीनच्या विद्वानांनी ‘भगवद्गीते’स संबोधले ‘ज्ञानाचे अमृत’ !

Chinese Scholars Bhagavad Gita : चीनच्या विद्वानांनी ‘भगवद्गीते’स संबोधले ‘ज्ञानाचे अमृत’ !

बीजिंग : चीनच्या विद्वानांनी ‘भगवद्गीते’स ‘ज्ञानाचे अमृत’ आणि ‘भारतीय संस्कृतीचा संक्षिप्त इतिहास’ असे संबोधले. भगवद्गीतेचा गौरव करतांना ते म्हणाले की, भगवद्गीता आधुनिक जगातील लोकांच्या आध्यात्मिक आणि भौतिक संकटांवरील उपायांचा स्रोत आहे. ‘भारतीय तत्त्वज्ञान परंपरांचा संगम’ नावाच्या परिसंवादात त्यांनी हे विचार मांडले. हा कार्यक्रम भारतीय दूतावासाने आयोजित केला होता.

ज्येष्ठ भारतशास्त्रज्ञ प्रा. झांग बाओशेंग (निवृत्त, पेकिंग विद्यापीठ)

भारतभ्रमण करतांना भगवान श्रीकृष्णाचे अस्तित्व अनुभवले ! – प्राध्यापक झांग बाओशेंग

या परिसंवादात ८८ वर्षीय प्राध्यापक झांग बाओशेंग हे मुख्य वक्ते होते. त्यांनी भगवद्गीतेचे चिनीमध्ये भाषांतर केले आहे. प्रा. झांग यांनी गीतेस ‘भारताचा तत्त्वज्ञान विश्वकोश आणि आध्यात्मिक महाकाव्य’ म्हटले. आजही भारतीय जीवनावर भगवद्गीतेचा पुष्कळ मोठा प्रभाव आहे. प्राध्यापक झांग यांनी सांगितले की, वर्ष १९८४ ते १९८६ या काळात भारतभ्रमण करतांना मी सर्वत्र भगवान श्रीकृष्णाचे अस्तित्व अनुभवले होते.

गीता हा प्राचीन युद्धभूमीवरील संवाद ! – प्राध्यापक वांग झी-चेंग

‘ओरिएंटल तत्त्वज्ञान संशोधन केंद्रा’चे संचालक प्राध्यापक वांग झी-चेंग यांनी सांगितले की, गीता हा ५ सहस्र वर्षांपूर्वीच्या प्राचीन भारतीय युद्धभूमीवरील संवाद आहे. हा संवाद आजही आधुनिक जीवनातील गुंतागुंत आणि चिंता सोडवण्यासाठी मार्गदर्शक ठरतो. त्यांनी गीतेतील कर्मयोग, सांख्ययोग आणि भक्तीयोग हे आधुनिक जीवनासाठी मार्गदर्शक असल्याचे नमूद केले.

भारतीय तत्त्वज्ञानाचा अभ्यास आवश्यक ! –  प्राध्यापक यू लोंग यू

शेन्झेन विद्यापिठातील भारतीय अभ्यास केंद्राचे प्राध्यापक यू लोंगयू यांनी सांगितले की, भारतीय तत्त्वज्ञान आणि सांस्कृतिक परंपरा अभ्यासासाठी उपयुक्त आहेत अन् चिनी  विद्वानांनी ते श्रद्धेने आत्मसात् करावे.

भगवद्गीता आधुनिक जीवनासाठी नैतिक आणि आध्यात्मिक दिशा देणारे अमूल्य मार्गदर्शन ! – भारतीय राजदूत प्रदीपकुमार रावत

भारतीय राजदूत प्रदीपकुमार रावत

भारतीय राजदूत प्रदीपकुमार रावत यांनी सांगितले की, भगवद्गीता केवळ धार्मिक ग्रंथ नाही, तर आधुनिक जीवनासाठी नैतिक आणि आध्यात्मिक दिशा देणारे अमूल्य मार्गदर्शन आहे. भारताचे तत्त्वज्ञान हे मानवतेसमोरच्या अत्यंत महत्त्वाच्या प्रश्नांची उत्तरे देण्याचा प्रयत्न करते.

नूतन लेख