पंतप्रधान मोदी मला फार आवडतात, ते माझे चांगले मित्र ! – Donald Trump

वॉशिंग्टन (अमेरिका) – मला तुमचे पंतप्रधान फार आवडतात. ते माझे चांगले मित्र आहेत आणि आमचे आपापसांत उत्तम जमते. आमचे संबंध फार चांगले आहेत, असे अमेरिकेचे राष्ट्राध्यक्ष डॉनल्ड ट्रम्प व्हाईट हाऊसमध्ये पत्रकारांशी बोलतांना म्हणाले.

भारत आणि अमेरिका यांच्यात लवकरच व्यापार करार होईल, असा विश्वासही त्यांनी व्यक्त केला.

भारताने अमेरिकेचा अपलाभ घेतल्याचा आरोप !

अनेक वर्षे भारताने अमेरिकेचा अपलाभ घेतला. त्यांनी आमच्यावर प्रचंड आयातशुल्क लादले आणि स्वतः मात्र काहीच दिले नाही, असा आरोप ट्रम्प यांनी केला. ‘हार्ले डेव्हिडसन’ आस्थापनाला भारतात येऊ दिले जात नव्हते. त्यांनी त्यावर २०० टक्के कर लावला होता. दुर्दैवाने हे माझ्या कार्यकाळापूर्वी घडले होते. त्यांना त्यांच्या मोटारसायकली इथे (अमेरिकेत) विकायच्या होत्या आणि आम्ही त्यांच्याकडून कोणताही कर घेत नव्हतो; पण गेल्या काही वर्षांत या व्यापारी संबंधांचे स्वरूप पालटले आहे. आता भारतासमवेतच्या आर्थिक संबंधांमधून अमेरिकेला अधिक लाभ होत असल्याचेही ट्रम्प यांनी माध्यमांशी बोलतांना सांगितले.