Operation Sindoor : ऑपेरेशन सिंदूर चालूच : भारताकडून पाकची हवाई संरक्षण यंत्रणा उद्ध्वस्त !

नवी देहली – पाकिस्तानने ७ मेच्या रात्रीनंतर ८ मेच्या रात्रीही भारतावर ड्रोनद्वारे आक्रमण केले; मात्र भारताच्या हवाई संरक्षण प्रणाली ‘एस् -४००’कडून या ड्रोन विमानांना हवेतच उडवून देण्यात आले. जम्मू विमानतळ, अखनूर, उधमपूर, आर्.एस्. पुरा, सांबा; पंजाबमधील पठाणकोट आणि राजस्थानच्या जैसलमेर येथे पाककडून ड्रोनद्वारे आक्रमण करण्यात आले होते. जम्मू विमानतळावर ८ ड्रोन पाठवण्यात आले होते ते सर्व हवेतच नष्ट करण्यात आले. तसेच पठाणकोट विमानतळावर आक्रमणासाठी आलेले पाकचे ड्रोन पाडण्यात आले. एकूण ३० हून अधिक ड्रोनद्वारे हे आक्रमण करण्यात आले होते. याच वेळी पाकची २ जे एफ्-१७ विमाने, तर १ एफ् १६ विमान अशी ३ लढाऊ विमाने भारताकडून पाडण्यात आल्याचे वृत्त आहे. यापूर्वी बालाकोट एअर स्ट्राईकनंतर पाकचे ‘एफ्-१६’ लढाऊ विमान भारतचे वैमानिक अभिनंदन यांनी पाडले होते.

१. संरक्षण मंत्रालयाने सांगितले की, ८ मेच्या सकाळी पाकिस्तानने केलेल्या आक्रमणानंतर भारतीय सशस्त्र दलांनी पाकिस्तानमधील अनेक ठिकाणी हवाई संरक्षण रडार आणि प्रणाली यांना लक्ष्य करण्यासाठी ‘हार्पी ड्रोन’चा वापर केला. भारताची कारवाई पाकिस्तानच्याच क्षेत्रात आणि त्याच वेगाने करण्यात आली.

२. इस्लामाबाद, लाहोर, सियालकोट, रावळपिंडी, गुजरानवाला, कराची येथील हवाई संरक्षण प्रणाली नष्ट झाली. यात रावळपिंडी येथील स्टेडियमची हानी झाल्याचे वृत्त आहे.

३. पंजाबमधील अमृतसरमध्ये ७ मेच्या रात्री स्फोटांचे आवाज ऐकू आले. ८ मेच्या सकाळी येथील दुधाला, जेठुवाल आणि पंढेर या ३ गावांच्या शेतात या रॉकेटचे अवशेष पडलेले आढळले. हे रॉकेट पाकिस्तानकडून डागण्यात आले होते आणि भारतीय संरक्षण यंत्रणेने पाडली होती.

हार्पी ड्रोन म्हणजे काय?

‘हार्पी ड्रोन’ हे इस्रायल-निर्मित मानवरहित हवाई वाहन आहे, जे ‘इस्रायल एरोस्पेस इंडस्ट्रीज’ने विकसित केले आहे. हे प्रामुख्याने शत्रूची रडार प्रणाली आणि हवाई संरक्षण प्रणाली नष्ट करण्यासाठी बनवण्यात आलेले आहे. हे ड्रोन पाळत ठेवण्यास आणि अचूक आक्रमण करण्यास सक्षम आहे, ज्यामुळे ते सैनिकी कारवायांमध्ये एक प्रभावी शस्त्र बनते. हार्पी ड्रोनला ‘फायर अँड फरगेट मिसाईल’ असेही म्हणतात; कारण आक्रमण केल्यानंतर हे ड्रोन नष्ट होते. भारताने वर्ष २००० मध्ये इस्रायलकडून हे ड्रोन खरेदी केले आहेत.

पंजाबमध्ये सैन्याने घुसखोराला ठार मारले

७ मे रोजी रात्री अंधाराचा लाभ घेत पाकमधून भारताच्या पंजाबमधील फिरोजपूर येथील सीमेवरून घुसखोरी करण्याचा प्रयत्न करणार्‍या एका व्यक्तीला सीमा सुरक्षा दलाच्या सैनिकांनी गोळ्या झाडून ठार मारले.

नेपाळ सीमेवर ४ चिनी नागरिकांना अटक

बिहारमधील पूर्व चंपारण जिल्ह्यातील रक्सौल सीमेवर ४ चिनी नागरिकांना अटक करण्यात आली. ते अवैधपणे भारतात प्रवेश करण्याचा प्रयत्न करत होते. त्यांच्याकडे व्हिसा नव्हता. सशस्त्र सीमा दलाने त्यांना अटक केली.