Russia Ukraine War : युक्रेनकडून रशियाच्या २० नौकांवर आक्रमण !

(सामुद्रधुनी म्हणजे दोन जलाशयांना जोडणारा जलमार्ग)

कीव्ह/मॉस्को (रशिया) – रशिया आणि युक्रेन यांच्यामधील सागरी संघर्ष अधिक तीव्र झाला आहे. १५ जुलैच्या रात्री युक्रेनने क्रिमियाजवळील रशियाच्या ‘शॅडो फ्लीट’मधील २० नौकांवर ड्रोनद्वारे आक्रमण केले. यामध्ये १७ तेलवाहू नौका, २ गॅस नौका आणि एका ‘टगबोटी’चा समावेश होता. या आक्रमणानंतर रशियाने अझोव्ह समुद्रातील नौकांच्या हालचालींवर निर्बंध घातले आहेत.

रशियाने या कारवाईला ‘आतंकवादी आक्रमण’ असे संबोधले आहे. तसेच अझोव्ह समुद्रातील नौकांच्या हालचालींवर निर्बंध घातले आहेत.

रशियाकडून युक्रेनवर सलग ५ व्या दिवशीही आक्रमणे चालूच

दुसरीकडे रशियाचे युक्रेनवरील आक्रमणे सलग पाचव्या दिवशीही चालूच आहेत. ओडेसा आणि आजूबाजूच्या भागांवर रशियाने ड्रोन आणि क्षेपणास्त्र यांद्वारे आक्रमण केले. ओडेसातील ७ मजली निवासी इमारतीवर क्षेपणास्त्र पडून ३ जणांचा मृत्यू झाला.

सागरी मार्गांवर वर्चस्वासाठी संघर्ष

भूमीवरील लढाई काही प्रमाणात मंदावल्यानंतर दोन्ही देशांनी समुद्राला नवे रणांगण बनवले आहे. रशिया युक्रेनच्या बंदरांवर आक्रमणे करून धान्य आणि सैनिकी पुरवठा रोखण्याचा प्रयत्न करत आहे, तर युक्रेन रशियाच्या तेल, गॅस आणि मालवाहू नौकांना लक्ष्य करत आहे. युक्रेनच्या ड्रोन कमांडरने गेल्या ९ दिवसांत अझोव्ह समुद्रातील ११६ रशियन नौकांना लक्ष्य केल्याचा दावा केला आहे. सततच्या आक्रमणानंतर रशियाने डॉन-अझोव्ह कालवा आणि केच सामुद्रधुनीतील (दोन जलाशयांना जोडणार्‍या जलमार्गातील) नौकांची वाहतूक थांबवल्याचे सांगण्यात येत आहे. या सागरी तणावाचा परिणाम रशियाच्या तेल, गहू आणि कृषी उत्पादनांच्या निर्यातीवर होण्याची शक्यता व्यक्त केली जात आहे. अझोव्ह समुद्रातून रशियाच्या अनुमाने २५ टक्के गव्हाची निर्यात होते.