साधकाला आध्यात्मिक त्रासाशी लढायला शिकवून साधनेत पुढे नेणारे परात्पर गुरु डॉ. आठवले !

‘एकदा रामनाथी (गोवा) येथील सनातनच्या आश्रमात एक याग होता. त्या दिवशी मला थकवा होता आणि माझी प्राणशक्ती न्यून झाली होती. त्यामुळे मी यागाला उपस्थित नव्हतो. परात्पर गुरु डॉ. आठवले यांना पुष्कळ शारीरिक थकवा असूनही ते यागाचे दर्शन घेण्यासाठी आले होते. त्यांनी तेथील एका साधकाला विचारले, ‘‘राम, यागाला आला नाही का ?’’ त्या वेळी साधकाने मी यागाला न येण्याची वरील कारणे त्यांना सांगितली. हे ऐकून परात्पर गुरु डॉक्टर म्हणाले, ‘‘अन्य साधकांनाही आध्यात्मिक त्रास होतात; पण ते यागाला उपस्थित रहातात ना !’’

नंतर त्या साधकाने वरील संभाषण मला सांगितले. त्या वेळी माझ्या मनात विचार आला, ‘यागाद्वारे माझ्यावर आध्यात्मिक  स्तरावरील उपाय होऊ नयेत’, यासाठी अनिष्ट शक्ती मला यागाला उपस्थित रहाण्यापासून परावृत्त करतात. हे सूत्र परात्पर गुरु डॉक्टरांनी माझ्या लक्षात आणून दिले आहे.’ त्यानंतर मी आश्रमातील प्रत्येक यागाला उपस्थित रहाण्याचा प्रयत्न करू लागलो. यागाच्या वेळी तेथे उपस्थित राहिल्याने ‘आध्यात्मिक त्रास न्यून होतो आणि साधना चांगल्या तर्‍हेने होण्यास साहाय्य होते’, हे लाभ माझ्या लक्षात आले.

या प्रसंगावरून ‘गुरूंचे वेळोवेळी मार्गदर्शन मिळणे महत्त्वाचे आहे’, हे मला शिकायला मिळाले आणि माझी परात्पर गुरु डॉक्टरांच्या चरणी कृतज्ञता व्यक्त झाली.’

– श्री. राम होनप, सनातन आश्रम, रामनाथी, गोवा.