पायाभूत सुविधांमध्ये सुधारणा झाल्यास महाराष्ट्रातील शाळा देशात प्रथम दर्जाच्या ठरतील ! – दीपक केसरकर, शिक्षणमंत्री

मुंबई, २९ नोव्हेंबर (वार्ता.) – ‘माझी शाळा सुंदर शाळा’ हे मुख्यमंत्र्यांचे स्वप्न आहे; मात्र शाळांच्या पायाभूत सुविधांमध्ये आपण मागे पडत आहोत. शाळांतील पायाभूत सुविधांसाठी ३५ टक्के निधी दिला जातो. पायाभूत सुविधा सुधारल्या, तर शाळांच्या दर्जामध्ये आपण देशात प्रथम दर्जाचे ठरू, असे वक्तव्य शिक्षणमंत्री दीपक केसरकर यांनी २८ नोव्हेंबर या दिवशी पत्रकार परिषदेत केले. या वेळी दीपक केसरकर म्हणाले, ‘‘विद्यार्थ्यांना शाळेमध्ये जाण्यासाठी वाहतुकीची सुविधा उपलब्ध करून देण्याचे दायित्व शासनाचे आहे. शासनाकडून वाहतुकीसाठी भत्ताही दिला जातो. दुर्गम भागातील एकही शाळा बंद होणार नाही. नवीन सुविधा आणतांना मुंबईतील शाळांच्या गच्चीवर स्वयंपाक बगीचा करण्यात येणार आहे.’’