वाढत्या कोरोनाच्या पार्श्वभूमीवर मुखपट्टीचा (मास्क) उपयोग करणे बंधनकारक ! – रूचेश जयवंशी, जिल्हाधिकारी, सातारा

सातारा, ५ एप्रिल (वार्ता.) – राज्यात कोरोनाचा प्रभाव वाढत चालला आहे. कोरोनाच्या पार्श्वभूमीवर आवश्यक पूर्वसिद्धता आणि उपाययोजना करण्याविषयी सचिव, सार्वजनिक आरोग्य विभाग यांनी सूचना केल्या आहेत. त्या अनुषंगाने सातारा जिल्हाधिकारी रूचेश जयवंशी यांनी सातारा जिल्ह्यातील सर्व शासकीय, निमशासकीय कार्यालये, बँका, शाळा, महाविद्यालये यांतील सर्व शासकीय अधिकारी आणि कर्मचारी यांना काळजी घेण्यासाठी मुखपट्टीचा (मास्कचा) उपयोग करण्याचे आदेश दिले आहेत.

आदेशात म्हटले आहे की, गर्दीच्या आणि सार्वजनिक ठिकाणी उदा. आठवडा बाजार, एस्.टी. स्टँड परिसर, यात्रा, मेळावे, लग्न समारंभ, मोठ्या प्रमाणात नागरिक एकत्र येण्याची ठिकाणे या सर्व ठिकाणी सर्व नागरिकांनी स्वयंस्फूर्तीने मुखपट्टीचा (मास्कचा) उपयोग करावा. सामाजिक अंतर ठेऊन वेळोवेळी सॅनिटायझरचा उपयोग करावा.