अक्कलकोट येथे वटवृक्ष मंदिरात परंपरेनुसार होणार श्रीदत्त जन्मोत्सव !

कोरोनाच्या पार्श्वभूमीवर श्रीदत्त पालखी सोहळा रहित !

अक्कलकोट येथील वटवृक्ष स्वामी मंदिर

अक्कलकोट, १७ डिसेंबर (वार्ता.) – वटवृक्ष स्वामी मंदिरात यंदा परंपरेनुसार १८ डिसेंबर या दिवशी श्रीदत्त जन्मोत्सव सोहळा आयोजित करण्यात आला आहे; मात्र कोरोनाच्या पार्श्वभूमीवर प्रशासनाच्या सूचनेनुसार श्रीदत्त पालखी सोहळा रहित करण्यात आला आहे, अशी माहिती मंदिर समितीचे अध्यक्ष तथा नगरसेवक महेश इंगळे यांनी दिली.

महेश इंगळे म्हणाले, ‘‘कोरोनाविषयी शासनाने घालून दिलेले नियम पाळून परंपरेनुसार मंदिर समितीच्या वतीने ज्योतीबा मंडपामध्ये धार्मिक कार्यक्रम आणि श्रीदत्त जन्मोत्सव अन् श्रीदत्त जयंती महोत्सव साजरा करण्यात येणार आहे. १८ डिसेंबर या दिवशी दुपारी ४ ते सायं. ५.३० या वेळेत श्रीदत्त जन्म आख्यान वाचन आणि भजन होईल. सायंकाळी ६ वाजता श्रीदत्त जन्मोत्सव सोहळा, आरती आणि पाळणा होईल. १९ डिसेंबर या दिवशी सकाळी ११.३० वाजता नैवेद्य आरती आणि प्रसाद वाटप होईल. दुपारी १ ते ३ या वेळेत भक्तनिवास भोजनकक्षामध्ये महाप्रसाद देण्यात येईल.’’