वर्ष २०२० मध्ये देशात आत्महत्या करणार्‍यांच्या संख्येत वाढ !

बेरोजगारी आणि गरिबी यांमुळे सर्वाधिक आत्महत्या

नवी देहली – ‘राष्ट्रीय गुन्हे नोंदणी विभागा’च्या आकडेवारीनुसार वर्ष २०२० मध्ये १ लाख ५३ सहस्र लोकांनी आत्महत्या केली. ही संख्या मागील वर्षापेक्षा अधिक आहे. विशेष म्हणजे गरिबीमुळे जीव देणार्‍यांची संख्या ७० टक्क्यांपर्यंत वाढली. वर्ष २०२० मध्ये गरिबीमुळे १ सहस्र ९०१ जणांनी आत्महत्या केली. वर्ष २०१९ मध्ये हा आकडा १ सहस्र १२२ होता. बेरोजगारीमुळे आत्महत्या करणार्‍यांची संख्या २ सहस्र ८५१ वरून ३ सहस्र ५४८, म्हणजे २४ टक्के इतकी वाढली. या दोन्ही कारणांमुळे सर्वाधिक आत्महत्या महाराष्ट्रात झाल्या.

The number of suicides surged by 10% in 2020 during the Covid-19 pandemic: NCRB reporthttps://t.co/aVUiGZG9fH

— OpIndia.com (@OpIndia_com) October 30, 2021

वर्ष २०२० मध्ये एकूण १ लाख ५३ सहस्र ५२ लोकांनी आत्महत्या केली. गरिबीमुळे आसाम, गुजरात, महाराष्ट्र आणि कर्नाटक या राज्यांमध्ये मिळून एकाच वर्षात आत्महत्या करणार्‍यांची एकूण संख्या ५७१ वरून १ सहस्र ११४ पर्यंत वाढली. याच राज्यांत बेरोजगारीमुळे वर्ष २०१९ मध्ये १ सहस्र ३७९ लोकांनी आत्महत्या केली, तर वर्ष २०२० मध्ये या संख्येत वाढ होऊन ती १ सहस्र ८०८ वर पोचली. झारखंडमध्ये गरिबीमुळे आत्महत्या करणार्‍यांची संख्या वर्ष २०१९ मधील २४ जणांच्या तुलनेत वर्ष २०२० मध्ये घटून १२ वर आली.